ନୂଆପଡା, ନୂଆପଡା ଜିଲ୍ଲା ଖଡିଆଳ ଥାନା ସାନମହେଶ୍ଵର ଗାଁ ନିକଟ ୩୫୩ ନଂ ଜାତୀୟ ରାଜପଥରେ ଏକ ଟ୍ରକ ଚାପାରେ ଜଣେ ନାବାଳିକାଙ୍କ ଘଟଣାସ୍ଥଳରେ ହିଁ ମୃତ୍ୟୁ ଘଟିଛି । ଦୁର୍ଘଟଣା ଏପରି ଥିଲା ନାବାଳିକାଙ୍କ ମୃତଦେହ ରାସ୍ତାରେ ମିଶି ଯାଇଥିଲା । ତେବେ ମୃତ ନାବାଳିକା ସାନମହେଶ୍ଵର ଗାଁ ର ହର ସୁନାନୀଙ୍କ ୫ ବର୍ଷର ଝିଅ ଡିମ୍ପଲ ସୁନାନୀ ବୋଲି ଜଣାପଡିଛି।
ମିଳିଥିବା ସୂଚନା ଅନୁସାରେ, ଖଡିଆଳ ସହର ପଟୁ ରାୟପୁର ଅଭିମୁଖେ ଦ୍ରୁତ ଗତିରେ ଯାଉଥିବା ଏହି ଟ୍ରକ ଆଜି ସକାଳ ପ୍ରାୟ ୮ଟା ସମୟରେ ସାନମହେଶ୍ଵର ଗାଁ ନିକଟରେ ଡିମ୍ପଲ ରାସ୍ତା ପାରି ହେଉଥିବା ତାକୁ ଧକ୍କା ଦେଇଥିଲା । ଦୁର୍ଘଟଣା ଏପରି ଭୟଙ୍କର ଥିଲା ଯେ, ମୃତକ ଡିମ୍ପଲର ଖଣ୍ଡବିଖଣ୍ଡିତ ମୃତଦେହ ଛିଟିକି ପଡିଥିବା ଦେଖିବାକୁ ମିଳିଛି । ଦୁର୍ଘଟଣା ଘଟାଇ ଟ୍ରକ ଫେରାର୍ ହେଉଥିବା ବେଳେ ସ୍ଥାନୀୟ ଲୋକେ ପିଛା କରି ୧ କିଲୋମିଟର ଦୂର ବଡମହେଶ୍ଵର ଗାଁ ନିକଟରେ ଟ୍ରକଟିକୁ କାବୁ କରିବାରେ ସଫଳ ହୋଇଥିବା ବେଳେ ଟ୍ରକ ଡ୍ରାଇଭର୍ ଫେରାର୍ ହୋଇଯାଇଛି । ଉକ୍ତ ଘଟଣାକୁ ନେଇ ଘଟଣାସ୍ଥଳରେ ଉତ୍ତେଜନା ଲାଗିରହିଛି। ମୃତ ନାବାଳିକାଙ୍କ ପରିବାରକୁ କ୍ଷତିପୂରଣ ଦାବୀ କରି ଗାଁ ଲୋକେ ୩୫୩ ନଂ ଜାତୀୟ ରାଜପଥକୁ ଅବରୋଧ କରିଛନ୍ତି । ଫଳରେ ଯାନବାହାନ ଚଳାଚଳ ବାଧାପ୍ରାପ୍ତ ହୋଇଛି । ଖବର ପାଇ ଖଡିଆଳ ପୋଲିସ ସେଠାରେ ପହଚିଂ ତଦନ୍ତ ଜାରି ରଖିଛି ।
