କଟକ, କଟକ- ପାରାଦୀପ ରାସ୍ତାର କନ୍ଦରପୁର ଟୋଲଗେଟ ନିକଟରେ ଘଟିଛି ମର୍ମନ୍ତୁଦ ସଡ଼କ ଦୁର୍ଘଟଣା । କଂକ୍ରିଟ ମିକ୍ସଚର ମେସିନକୁ ଧକ୍କା ଦେବା ପରେ ବାଇକ୍ ଜଳି ଯାଇଛି । ଫଳରେ ଦୁଇ ବାଇକ୍ ଆରୋହୀ ଜୀବନ୍ତ ଦଗ୍ଧ ହୋଇଯାଇଛନ୍ତି । ଦୁର୍ଘଟଣାରେ ଉଭୟଙ୍କ ମୃତ୍ୟୁ ଘଟିଛି । ମୃତକ ଦ୍ଵୟ ଦେଲେ ରାଜେଶ ଦାସ ଓ ଇଶାନ ସାହୁ । ଏମାନେ ଜଗତସିଂହପୁର ଜିଲ୍ଲା ତିର୍ତୋଲ ଅଂଚଳର ହୋଇଥିବା ସୂଚନା ମିଳିଛି ।
ଗତକାଲି ବିଳମ୍ବିତ ରାତିରେ ଏହି ଦୁଇ ଜଣ ଯୁବକ ଏକ ବାଇକ୍ ରେ ତିର୍ତୋଲରୁ କଟକ ଅଭିମୁଖେ ଆସୁଥିଲେ । ମିକ୍ସର ମେସିନ୍ ଟି କନ୍ଦରପୁର ଟୋଲଗେଟ୍ ରେ ଅଟକି ଟୋଲ ଫି ଦେଉଥିବା ସମୟରେ ବାଇକ୍ ଦ୍ରୁତ ଗତିରେ ଆସି ମିକ୍ସର ମେସିନର ପଛରେ ଧକ୍କା ଦେଇଥିଲା । ଦୁର୍ଘଟଣା ପରେ ବାଇକ୍ ରେ ନିଆଁ ଲାଗି ଯାଇଥିଲା । ହୁତୁହୁତୁ ହୋଇ ଜଳି ଉଠିଥିଲା ବାଇକ୍ । ୨ଯୁବକ ଜୀବନ୍ତ ଜଳି ଯାଇଥିଲେ । ଖବର ପାଇ କନ୍ଦରପୁର ପୁଲିସ ଓ ଅଗ୍ନିଶମ ବାହିନୀ ଘଟଣାସ୍ଥଳରେ ପହଂଚି ନିଆଁକୁ ଆୟତ କରିଥିଲେ । ୨ଜଣଙ୍କୁ ଉଦ୍ଧାର କରି କଟକ ବଡ଼ ମେଡ଼ିକାଲକୁ ନେଇଥିଲେ । ହେଲେ ସେଠାରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଥିଲେ । କନ୍ଦରପୁର ପୁଲିସ ଏକ ମାମଲା ରୁଜୁ କରି ଘଟଣାର ତଦନ୍ତ କରୁଛି । ଏହାସହ ପୁଲିସ ଦୁର୍ଘଟଣାଗ୍ରସ୍ତ ବାଇକ ଓ କଂକ୍ରିଟ ମିକ୍ସର ମେସିନକୁ ଜବତ କରିଛି ।
