ଜଗନ୍ନାଥ ପ୍ରସାଦ : ଗଞ୍ଜାମ ଜିଲ୍ଲା ଜଗନ୍ନାଥ ପ୍ରସାଦ ବ୍ଲକ ଅନ୍ତର୍ଗତ ଆଞ୍ଚଳିକ ଉଚ୍ଚ ମାଧ୍ୟମିକ ବିଦ୍ୟାଳୟ, ଜଗନ୍ନାଥ ପ୍ରସାଦର ଯୁବ ରେଡକ୍ରସ ସଂସ୍ଥା ତରଫରୁ ଆନ୍ତର୍ଜାତିକ ସ୍ଵେଚ୍ଛାସେବୀ ଦିବସ ପାଳିତ ହୋଇଯାଇଛି । ଅଧ୍ୟକ୍ଷ ଶ୍ରୀଯୁକ୍ତ ନୃସିଂହ ଚରଣ ପ୍ରଧାନ ଏହି କାର୍ଯ୍ୟକ୍ରମକୁ ଉଦଘାଟନ କରି ସମାଜପାଇଁ ସ୍ଵେଚ୍ଛାସେବୀର ଅବଦାନ ସମ୍ପର୍କରେ ଉଦବୋଧନ ଦେବା ସହ ମହାବିଦ୍ୟାଳୟ ରୁ ରାଜ୍ୟ ସ୍ତରୀୟ ସ୍ୱେଚ୍ଛାସେବୀ ଦିବସରେ ଯୋଗ ଦେବାକୁ ଭୁବନେଶ୍ବର ଯାଇଥିବା ଯୁବ ସ୍ଵେଚ୍ଛାସେବୀ ଏବଂ ରଣପା ନୃତ୍ୟ ଶିଳ୍ପୀ ମାନଙ୍କୁ ଉଚ୍ଚ ପ୍ରସଂଶା କରିଥିଲେ । ରେଡ୍ କ୍ରସ୍ ପରାମର୍ଶଦାତା ଅଧ୍ଯାପକ ଲୋକନାଥ ମହାନ୍ତି ସ୍ଵେଚ୍ଛାସେବୀର ସଂଜ୍ଞା ଓ ଏହାର ଲକ୍ଷ୍ୟ ଓ ଉଦ୍ଦେଶ୍ୟ ସମ୍ପର୍କରେ ସ୍ୱ ଅନୁଭୂତି ବଖାଣି ଥିଲେ । ପୁରାତନ ସ୍ଵେଚ୍ଛାସେବୀ ସରୋଜ କୁମାର ନାୟକ ନିଜସ୍ଵ ଅନୁଭୂତି ବର୍ଣ୍ଣନା କରିବା ସହିତ ସମାଜ ସେବା ପାଇଁ ନିଜେ ଗଠନ କରିଥିବା ସୁରକ୍ଷା ସ୍ଵେଚ୍ଛାସେବୀ ସଂଗଠନ ସମ୍ପର୍କରେ କହିଥିଲେ । ସ୍ଵେଚ୍ଛାସେବୀ ପି ତୁଳସୀ ସେନାପତି ପ୍ରାରମ୍ଭିକ ସଙ୍ଗୀତ ଗାନ କରିଥିବା ବେଳେ ସ୍ଵେଚ୍ଛାସେବୀ ଆଲୋକ କୁମାର ଷଡଙ୍ଗୀ, ଶିବାନୀ ପାତ୍ର ଓ ସୁଜାତା ପ୍ରଧାନ ନିଜ ନିଜର ସ୍ଵେଚ୍ଛାସେବୀ ଜୀବନର ଅନୁଭୂତି ବର୍ଣ୍ଣନା କରିଥିଲେ । ଏହି କାର୍ଯ୍ୟକ୍ରମରେ ବହୁ ସ୍ଵେଚ୍ଛାସେବୀ ଯୋଗ ଦେଇ ଥିଲେ । ଶେଷରେ ସ୍ଵେଚ୍ଛାସେବୀ ରୋଜାଲିନ ଷଡଙ୍ଗୀ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ ।
