-
ଅଭିଯୁକ୍ତ ଗୋପାଳର ଘରେ ଓ ଏସବିଆଇ ଶାଖାରେ କ୍ରାଇମବ୍ରାଂଚ ଟିମ୍
ଗଞ୍ଜାମ, ସ୍ଵାସ୍ଥ୍ୟମନ୍ତ୍ରୀ ନବ କିଶୋର ଦାସଙ୍କୁ ଗୁଳି କରି ହତ୍ୟା ମାମଲାର ତଦନ୍ତ କରୁଛି କ୍ରାଇମବ୍ରାଂଚ । ଆଜି ତଦନ୍ତର ସପ୍ତମ ଦିନରେ ଅଭିଯୁକ୍ତ ଗୋପାଳ ଦାସର ବ୍ରହ୍ମପୁର ଶିଳ୍ପାଚଂଳ ଅନ୍ତର୍ଗତ ଆଙ୍କୁଲି ସ୍ଥିତ ଘରେ ପହଂଚି ତଦନ୍ତ କରିଛି କ୍ରାଇମବ୍ରାଂଚ ଟିମ୍ । ଗୋପାଳର ସ୍ତ୍ରୀ ଜୟନ୍ତୀ ଦାସ, ପୁତୁରା ଓ ଅନ୍ୟ ସମ୍ପର୍କିୟଙ୍କୁ ପଚରା ଉଚରା କରିଛି ଟିମ୍ । ଗୋପାଳଙ୍କ ପଡ଼ିଶା ଘର ଲୋକଙ୍କୁ ମଧ୍ୟ ପଚରା ଉଚରା କରିଛି । ଏହାପରେ ବ୍ରହ୍ମପୁର ବସଷ୍ଟାଣ୍ଡ ଯାଇ ଅଭିଯୁକ୍ତ ଗୋପାଳ ନିକଟକୁ ଯେଉଁ ବସ୍ ରେ ଔଷଧ ପଠାଯାଉଥିଲା ତା’ର ଡ୍ରାଇଭର ଓ କର୍ମଚାରୀଙ୍କୁ ପଚରାଉଚରା କରିଛି ଟିମ୍ । ୪ ଜଣ ଡ୍ରାଇଭର ଓ ଦୁଇ ଜଣ କଣ୍ଡକ୍ଟରଙ୍କୁ ପଚରା ଉଚରା କରିଛି କ୍ରାଇମବ୍ରାଂଚ ଟିମ୍ । ଏହାପରେ ବ୍ରହ୍ମପୁର ଏମକେସିଜି ମେଡ଼ିକାଲ ପରିସରରେ ଥିବା ଏସବିଆଇ ଶାଖାରେ ପହଂଚି ପରିଚାଳକଙ୍କୁ ଗୋପାଳ ଦାସର ବ୍ୟାଙ୍କ ଆକାଉଂଟ ସମ୍ପର୍କରେ ପଚରା ଉଚରା କରିଥିଲେ ।
ପ୍ରକାଶ ଥାଉକି, ଗତକାଲି ମଧ୍ୟ ବସ୍ ଡ୍ରାଇଭର ଓ ଏହାର କର୍ମଚାରୀଙ୍କୁ ପଚରା ଉଚରା କରିଥିଲା କ୍ରାଇମବ୍ରାଂଚ । ପୂର୍ବରୁ ମଧ୍ୟ ଗୋପାଳର ପରିବାର ଲୋକଙ୍କୁ ପଚରା ଉଚରା କରିଥିଲା ଟିମ୍। ସ୍ଵାସ୍ଥ୍ୟମନ୍ତ୍ରୀ ନବ ଦାସ ହତ୍ୟା ମାମଲାର ତଦନ୍ତ କରୁଛି କ୍ରାଇମବ୍ରାଂଚର ତିନୋଟି ଟିମ୍ । ଏଡିଜି ଅରୁଣ ବୋଥ୍ରାଙ୍କ ନେତୃତ୍ଵରେ ମାମଲାର ତଦନ୍ତ ଚାଲିଥିବା ବେଳେ ବ୍ରହ୍ମପୁର ଆସିଥିବା ଟିମ୍ ର ନେତୃତ୍ଵ ନେଇଛନ୍ତି ଡିଏସପି ଶିଶିର ମିଶ୍ର ।
