ବଲାଙ୍ଗୀର, ବଲାଙ୍ଗିର ସହର ମଧ୍ୟରେ ଦିନକୁ ଦିନ ନିଶା ଦ୍ରବ୍ୟ କାରବାର ବୃଦ୍ଧି ପାଉଥିବା ବେଳେ ଅପରାଧ ମଧ୍ୟ ବୃଦ୍ଧି ପାଉଛି। ବଲାଙ୍ଗୀର ସହରରେ ଅପରାଧିମାନଙ୍କ ସଂଖ୍ୟା ଓ କୁଚିଆ ମଦ ବେପାରୀଙ୍କ ସଂଖ୍ୟା ଦିନକୁ ଦିନ ବଢିବାରେ ଲାଗିଛି। ଆଜି ଟାଉନ ପୋଲିସ ୬ ଜଣ ପେସାଦାର କୁଚିଆ ମଦ ବେପାରୀଙ୍କୁ ୧୧୦ ଦଫାରେ ଗିରଫ କରି କୋର୍ଟଚାଲାଣ କରିଛି। ଏହି ୬ ଜଣ କୁଚିଆ ମଦ ବେପାରୀ ପୂର୍ବରୁ ମଧ୍ୟ ଗିରଫ ହୋଇ ଜେଲ ଯାଇଥିବା ବେଳେ ଜାମିନରେ ଆସି ନିଜର ପୂର୍ବ ବେପାର ଜାରି ରଖିଥିଲେ। ବାରମ୍ବାର ଗିରଫ ହୋଇ ଜେଲ ଗଲେ ମଧ୍ୟ ଜାମିନରେ ବାହାରି ପୁଣି ମଦ ବେପାର କରୁଥିଲେ। ତେବେ ଏଭଳି କୁଚିଆ ମଦ ବେପାରୀମାନଙ୍କୁ ସାବାଡ କରିବା ପାଇଁ ବଲାଙ୍ଗୀର ଏସପି ନିତିନ କୁଶଲକରଙ୍କ ନିର୍ଦ୍ଦେଶକ୍ରମେ ଏହି ଥର ୧୧୦ ସିଆରପିସି ଦଫାରେ ଗିରଫ କରିଯାଇଛି ବୋଲି ଏସଡିପିଓ ତୋଫାନ ବାଗ ଶୁକ୍ରବାର ଟାଉନ ଥାନାରେ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି। ଅଭିଯୁକ୍ତ ମାନଙ୍କୁ କୋର୍ଟଚାଲାଣ କରାଯାଇଛି।
