ଘଟଗାଁ/ହରିଚନ୍ଦନପୁର,କେନ୍ଦୁଝର ଜିଲ୍ଲା ପଣ୍ଡାପଡ଼ା ଥାନା ଅନ୍ତର୍ଗତ ବଲାଣିପଶି ଛକ ନିକଟରେ ଘଟିଯାଇଛି ଏକ ମର୍ମନ୍ତୁଦ ସଡ଼କ ଦୁର୍ଘଟଣା । ଦୁର୍ଘଟଣାରେ ୪ ଜଣଙ୍କ ମୃତ୍ୟୁ ହୋଇଥିବା ବେଳେ ୪ ଜଣ ଗୁରୁତର ହୋଇଛନ୍ତି ।
ସୂଚନା ଅନୁଯାୟୀ, ବଡକମଣ୍ଡରା ଗ୍ରାମର ୭ ଜଣ ଚାଷୀ ଆଜି ସକାଳେ ଶୋଲା ବିକ୍ରି ନିମନ୍ତେ ଏକ ଅଟୋ ରିକ୍ସା ଯୋଗେ କେନ୍ଦୁଝର ଯାଇଥିଲେ । ବିକ୍ରି ପରେ ସେଠାରୁ ଅଟୋ ନଂ ଓଡ଼ି୦୯ଏନ-୧୮୮୩ ଯୋଗେ ଫେରୁଥିବା ସମୟରେ ବଲାଣିପଶି ଛକ ନିକଟରେ ପୂର୍ବାହ୍ନ ପ୍ରାୟ ସାଢ଼େ ୯ଟା ସମୟରେ ପିକଅପ୍ ଭ୍ୟାନ୍ ନଂ ଓଡ଼ି୧୧ଏ -୧୪୫୬ ସହିତ ମୁହାଁମୁହିଁ ଧକ୍କା ହୋଇଥିଲା । ଫଳରେ ଘଟଣାସ୍ଥଳରେ ତିନି ଜଣଙ୍କର ମୃତ୍ୟୁ ହୋଇଥିଲା । ଖବର ପାଇ ପୋଲିସ ଘଟଣାସ୍ଥଳରେ ପହଂଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲା । ଦୁର୍ଘଟଣାରେ ଗୁରୁତର ୫ ଜଣଙ୍କୁ କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତି କରାଯାଇଥିଲା । ସେଠାରେ ଜଣକର ମୃତ୍ୟୁ ଘଟିଛି । ଏହାକୁ ମିଶାଇ ଦୁର୍ଘଟଣାଜନିତ ମୃତ୍ୟୁ ସଂଖ୍ୟା ୪କୁ ବୃଦ୍ଧି ପାଇଛି । ମୃତକ ମାନେ ହେଲେ ରାଧୁ ନାଏକ, ନବୀନ ନାଏକ, ଜୀବନ ନାଏକ, ପ୍ରହଲ୍ଲାଦ ନାଏକ । ସେହିପରି ୪ ଗୁରୁତର ହେଲେ ଭାସ୍କର ସେଠୀ, ଚତୁର୍ଭୁଜ ନାଏକ, ଲିଟୁ ନାଏକ, ସନାତନ ନାଏକ । ଗୁରୁତର ମାନେ ଚିକିତ୍ସାଧିନ ରହିଛନ୍ତି ।
