ଢ଼େଙ୍କାନାଳ, ଢ଼େଙ୍କାନାଳ- ଅନୁଗୁଳ ୫୫ ନଂ ଜାତୀୟ ରାଜପଥର ଢ଼େଙ୍କାନାଳ ସଦର ଥାନା ଅନ୍ତର୍ଗତ ପଂଚୁପଟୀ ନିକଟରେ ଗତକାଲି ବିଳମ୍ବିତ ରାତିରେ ଭାରସାମ୍ୟ ହରାଇ ବ୍ରିଜ୍ ତଳକୁ ଖସିପଡିଛି ଏକ ଟୁରିଷ୍ଟ ବସ୍ । ଫଳରେ ଦୁଇ ଜଣଙ୍କର ମୃତ୍ୟୁ ଘଟିଛି । ଦୁର୍ଘଟଣାରେ ୩୦ରୁ ଉର୍ଦ୍ଧ୍ଵ ଆହତ ହୋଇଛନ୍ତି । ଆହତ ମାନଙ୍କୁ ସ୍ଥାନୀୟ ଲୋକଙ୍କ ସହାୟତାରେ ଉଦ୍ଧାର କରାଯାଇ ପ୍ରଥମେ ଢ଼େଙ୍କାନାଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତି କରାଯାଇଥିଲା । ତନ୍ମଧ୍ୟରୁ ଗୁରୁତର ୨୨ ଜଣଙ୍କୁ ପରେ କଟକ ବଡ଼ ମେଡ଼ିକାଲକୁ ସ୍ଥାନାନ୍ତରିତ କରାଯାଇଛି । ଆହତଙ୍କ ମଧ୍ୟରେ ଶିଶୁ ଓ ମହିଳା ମଧ୍ୟ ରହିଛନ୍ତି । ଖବର ପାଇ ପୋଲିସ ଘଟଣାସ୍ଥଳରେ ପହଂଚି ତଦନ୍ତ ଚଳାଇଛି । କିପରି ଓ କେଉଁ ପରିସ୍ଥିତିରେ ଏହି ଦୁର୍ଘଟଣା ଘଟିଲା ସେନେଇ ଛାନଭିନ୍ ଜାରୀ ରଖିଛି ପୋଲିସ ।
୪୩ ଜଣ ଯାତ୍ରୀଙ୍କୁ ନେଇ ବସ୍ ଟି ବଲାଙ୍ଗିରରୁ କେନ୍ଦ୍ରାପଡ଼ା ଇଚ୍ଛାପୁରକୁ ଫେରୁଥିବା ବେଳେ ଏହି ଏହି ଦୁର୍ଘଟଣା ଘଟିଛି । କେନ୍ଦ୍ରାପଡ଼ା ଇଛାପୁର ଗ୍ରାମର ୪୩ ଜଣ ଯାତ୍ରୀ ଏହି ବସ୍ ଯୋଗେ ବଲାଙ୍ଗିର ଏବଂ ସମ୍ବଲପୁର ବୁଲିବାକୁ ଯାଇଥିଲେ । ସେମାନେ ଆଜି ଫେରୁଥିବା ବେଳେ ଏହି ଦୁର୍ଘଟଣା ଘଟିଛି ।
