କନ୍ଧମାଳ,ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ (ଏବିଭିପି ), କନ୍ଧମାଳ ତରଫରୁ ଆଜି ଏକ ବିଶାଳ ଛାତ୍ର ସମାବେଶ ଅନୁଷ୍ଠିତ ହୋଇଯାଇଛି। ରାଜ୍ୟ ସହ ସମ୍ପାଦିକା ସଞ୍ଜନା କହଁରଙ୍କ ନେତୃତ୍ଵରେ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ, କନ୍ଧମାଳ ତରଫରୁ ଜିଲ୍ଲାର ଶିକ୍ଷା, ସୁରକ୍ଷା ଓ ରୋଜଗାର ଦାବିରେ ଏକ ବିଶାଳ ଛାତ୍ର ସମାବେଶ ଆୟୋଜନ କରାଯାଇଛି। ଜିଲ୍ଲାରେ ବିଦ୍ୟାର୍ଥୀ ମାନଙ୍କୁ ଶିକ୍ଷା କ୍ଷେତ୍ରରେ ରାଜ୍ୟ ସରକାର ସାବତ ପୁଅ ଭଳି ବ୍ୟବହାର କରିଆସୁଛନ୍ତି। ମହାବିଦ୍ୟାଳୟ ଗୁଡିକରେ ଅଧ୍ୟାପକ ମାନଙ୍କୁ ନିଯୁକ୍ତି ପ୍ରଦାନ କରିବା ଦରକାର। ପ୍ରତିଦିନ ଜିଲ୍ଲାରେ ଝିଅ ମାନେ ବଳାତ୍କାର ଓ ହିଂସାର ଶିକାର ହେଉଛନ୍ତି। ରାଜ୍ୟ ସରକାର କନ୍ଧମାଳ ଜିଲ୍ଲାର ବିଦ୍ୟାର୍ଥୀ ମାନଙ୍କୁ ରୋଜଗାରର ସାଧନ ନଯୋଗାଇ ଗଞ୍ଜେଇ ଚାଲାଣକୁ ପରୋକ୍ଷରେ ସମର୍ଥନ ଦେଇ ସେମାନଙ୍କୁ ଗଞ୍ଜେଇ ଚାଲାଣକାରୀ କରିଦେଇଛନ୍ତି। କନ୍ଧମାଳର ଉଚ୍ଚ ଶିକ୍ଷାର ଏନ୍ତୁଡ଼ି ଶାଳ ଫୁଲବାଣୀ ସରକାରୀ ସ୍ଵୟଂ ଶାସିତ ମହାବିଦ୍ୟାଳୟରେ ଅଧ୍ୟାପକ ପଦବୀ ପୂରଣ କରିବା ପାଇଁ ସରକାର ଶୀଘ୍ର ବ୍ୟବସ୍ଥା କରନ୍ତୁ। କନ୍ଧମାଳ ଜିଲ୍ଲାର ଆଦିବାସୀ ଆଶ୍ରମ ବିଦ୍ୟାଳୟ ଗୁଡିକରେ ସରକାର ବିଦ୍ୟାର୍ଥୀ ମାନଙ୍କ ସୁରକ୍ଷା ପାଇଁ ଶୀଘ୍ର ବ୍ୟବସ୍ଥା କରନ୍ତୁ ବୋଲି ରାଜ୍ୟ ସହ ସମ୍ପାଦକ ସ୍ଵାଗତ କୁମାର ତ୍ରିପାଠୀ କହିଛନ୍ତି। ସେହିପରି ଜିଲ୍ଲାରେ ନାରୀ ମାନଙ୍କ ପ୍ରତି ହେଉଥିବା ଅତ୍ୟାଚାରରେ ସାମିଲ ଥିବା ଲୋକଙ୍କ ପ୍ରତି ସରକାର କଡା କାର୍ଯ୍ୟାନୁଷ୍ଠାନ ନିଅନ୍ତୁ। ଆଦିବାସୀ ଛାତ୍ରାବାସରେ ଛାତ୍ରୀ ମାନଙ୍କୁ ଯୌନ ଶୋଷଣ ହେଉଥିବାର ଖବର ପ୍ରତିଦିନ ଖବର କାଗଜରେ ପୃଷ୍ଠା ମନ୍ଡନ କରୁଛି। ସରକାର ଦୋଷୀଙ୍କ ବିରୁଦ୍ଧରେ କଡା କାର୍ଯ୍ୟନୁଷ୍ଠାନ ନିଅନ୍ତୁ। କନ୍ଧମାଳ ଜିଲ୍ଲାର ଛାତ୍ରୀ ମାନଙ୍କ ପାଇଁ ସରକାର ଉଚ୍ଚ ଶିକ୍ଷା ପାଇଁ ସ୍ଵତନ୍ତ୍ର ବ୍ୟବସ୍ଥା କରନ୍ତୁ ବୋଲି ରାଜ୍ୟ ସହ ସମ୍ପାଦିକା ସଞ୍ଜନା କହଁର କହିଛନ୍ତି। ଏହି କାର୍ଯ୍ୟକ୍ରମରେ ଶଙ୍କରାଚାର୍ଯ୍ୟ ସଂସ୍କୃତ କନ୍ୟାଶ୍ରମର ମୁଖ୍ୟ ସ୍ଵାମୀ ଜୀବନ ମୁକ୍ତାନନ୍ଦ ପୁରୀ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ।
କାର୍ଯ୍ୟକ୍ରମରେ ଜିଲ୍ଲା ପ୍ରମୁଖ ଶିବାଶିଷ ପଣ୍ଡା, ଗଞ୍ଜାମ ବିଭାଗ ସଂଗଠନ ସମ୍ପାଦକ ସୋଭାଗ୍ୟ ମହାନ୍ତି, ଜିଲ୍ଲା ସଂଯୋଜକ ରୁଦ୍ରପ୍ରସାଦ ସେଠି, ଜିଲ୍ଲା ସହ ସଂଯୋଜିକା ରାଜନନ୍ଦିନି ସାହାଣୀ, ରାଜ୍ୟ ଜନଜାତି ଛାତ୍ରୀଙ୍କ ସହ ତଅପୋଇ କହଁର, ଫୁଲବାଣୀ ନଗର ସମ୍ପାଦକ ଅମିତ ବେହେରା, ଗଞ୍ଜାମ ବିଭାଗ ଏସଏଫଏସ୍ ପ୍ରମୁଖ ଦିବ୍ୟରଞ୍ଜନ ଡାକୁଆ, ଅମୀର କହଁର, ରାଜ୍ୟ କାର୍ଯ୍ୟକାରିଣୀ ସଦସ୍ୟ ଜିତେନ୍ଦ୍ର କହଁର, ଶୁଭମଜ୍ୟୋତି ପ୍ରଧାନ, ସୋମନାଥ ପ୍ରଧାନ, କାଶୀନାଥ ଗଣ୍ଡା, ଜିଲ୍ଲା ଜନଜାତି ଛାତ୍ରୀ ପ୍ରମୁଖ ପଦ୍ମାବତୀ କହଁର, କନ୍ଧମାଳ ସଂଗଠନ ସମ୍ପାଦକ ଟୁକୁନା ମଲ୍ଲିକ ଏବଂ କନ୍ଧମାଳ ଜିଲ୍ଲାର ୨୬ ଟି ମହାବିଦ୍ୟାଳୟରୁ ବହୁ ଛାତ୍ରଛାତ୍ରୀ ସାମିଲ ହେଇଥିଲେ।
