ବଲାଙ୍ଗିର, ଗୁରୁବାର ସନ୍ଧ୍ୟା ସାଢ଼େ ୭ ଟା ସମୟରେ ପାଟଣାଗଡ କୁତମୁଣ୍ଡା ସ୍ଥିତ ନର୍ସରିରୁ ଭୋଜିଭାତ କରି ଫେରୁଥିବା ସମୟରେ ସମଲେଶ୍ଵର ଛକ ନିକଟରେ ଦୁଇ ବାଇକ୍ ମୁହାଁମୁହିଁ ଧକ୍କା ହେବାରୁ ଜଣେ ଯୁବକଙ୍କର ମୃତ୍ୟୁ ହୋଇଥିବା ଜଣାପଡିଛି । ମୃତକ ଜଣକ ହେଲେ ପାଟଣାଗଡ଼ ଥାନା ଅନ୍ତର୍ଗତ ଚକାମାଲ ଗ୍ରାମର କେଶବ ବିଶି (୨୩) ବୋଲି ଜଣାପଡିଛି । ଅନ୍ୟପକ୍ଷରେ କୁତମୁଣ୍ଡା ଗ୍ରାମର ଦୁଇ ଜଣ ଯୁବକ ପାଟଣାଗଡ଼ରୁ ଦୈନିକ ମଜୁରିଆ କାମ ସାରି ନିଜ ଗାଁ କୁତମୁଣ୍ଡାକୁ ନିଜ ବାଇକ୍ ଯୋଗେ ଫେରୁଥିବା ସମୟରେ ସମଲେଶ୍ଵର ଛକ ନିକଟରେ ନର୍ସରିରେ ଭୋଜିଭାତ ସାରି ଏକ ବାଇକ୍ ଯୋଗେ ତିନି ଜଣ ଯୁବକ ମଦ୍ୟପାନ କରି ଫେରୁଥିଲେ । ନିଶାସକ୍ତ ଅବସ୍ଥାରେ ସେମାନେ କୁତମୁଣ୍ଡା ଗ୍ରାମର ଦୁଇଜଣ ଯୁବକଙ୍କ ବାଇକ୍ ସହ ମୁହାଁମୁହିଁ ଧକ୍କା ହୋଇଥିଲା । ଫଳରେ ଘଟଣାସ୍ଥଳରେ ବାଇକ୍ ଚାଳକ କେଶବ ବିଶିଙ୍କ ମୃତ୍ୟୁ ଘଟିଥିଲା । ସେହି ରାସ୍ତା ଦେଇ ଯାଉଥିବା କିଛି ଯୁବକ ଆମ୍ବୁଲାନ୍ସ ଓ ପୁଲିସକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ପୁଲିସ୍ ପହିଞ୍ଚି ଆମ୍ବୁଲାନ୍ସ ଯୋଗେ ମୃତ କେଶବଙ୍କ ସହ ଅନ୍ୟ ଚାରି ଜଣଙ୍କୁ ପାଟଣାଗଡ଼ ଡାକ୍ତରଖାନାକୁ ନେଇଥିଲେ । କୁତମୁଣ୍ଡା ଗାଁ ବିଦେଶୀ ଧରୁଆଙ୍କ ଅବସ୍ଥା ଗୁରୁତର ଥିବାରୁ ତାଙ୍କୁ ବଲାଙ୍ଗିର ଭୀମଭୋଇ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିବା ବେଳେ ଅନ୍ୟ ତିନିଜଣ ଯୁବକଙ୍କ ମଧ୍ୟରୁ ପାଟଣାଗଡ଼ ଟିକାପାଲିର ଶିବା ଖମାରୀ ପାଟଣାଗଡ଼ ଡାକ୍ତରଖାନାରେ ଚିକିତ୍ସାଧିନ ଅଛନ୍ତି । ପ୍ରାଥମିକ ଚିକିତ୍ସା ପରେ ଅନ୍ୟ ଦୁଇଜଣ ଘରକୁ ଫେରି ଯାଇଥିବା ଜଣାପଡିଛି । ମୃତ କେଶବଙ୍କ ଶବ ଡାକ୍ତରଖାନା ସ୍ଥିତ ଶବ ଗୃହରେ ରଖାଯାଇଥିବା ବେଳେ ଆଜି ଶବ ବ୍ୟବେଚ୍ଛେଦ କରାଯିବ ବୋଲି ପୁଲିସ ସୂତ୍ରରୁ ଜଣାପଡିଛି।
