ସୀମାନ୍ତରେ ଗୋ ମାଫିଆଙ୍କ ଆତଙ୍କ

• ୩ ଗୋରୁଙ୍କୁ ଉଦ୍ଧାର ସହିତ ଗାଡି ଜବତ କଲା ପୋଲିସ ।

• ଘଟଣା ସ୍ଥଳରୁ ଅଭିଯୁକ୍ତ ଫେରାର ।

ଯୋଡ଼ା,  ସୀମାନ୍ତ ଖଣି ଅଞ୍ଚଳରେ ସକ୍ରିୟ ହୋଇ ପଡିଛନ୍ତି ଗୋ ମାଫିଆ । ବୁଲା ଗାଈ ଗୋରୁଙ୍କ ଉପରେ ଗୋ ମାଫିଆଙ୍କ ଲୋଲୁପ ଦୃଷ୍ଟି । ରାତି ଅନ୍ଧାରରେ ଗୋ ମାଫିଆ ରାସ୍ତା କଡ଼ରୁ ବୋଲେରୋ ଗାଡ଼ିରେ ଗାଈ ଗୋରୁଙ୍କୁ ଉଠାଇ ନେଇଥିବା ଘଟଣା ସାମ୍ନାକୁ ଆସୁଥିବା ବେଳେ ଗତ ରାତି ବଲାଣି ପୋଲିସ ୩ ଗୋରୁଙ୍କୁ ଉଦ୍ଧାର କରିଥିବା ବେଳେ ଗାଈ ଚୋରାଇ ନେଉଥିବା ଗାଡିଟିକୁ ଜବତ କରିବାରେ ସକ୍ଷମ ହୋଇଛି ତେବେ ଘଟଣା ସ୍ଥଳରୁ ଅଭିଯୁକ୍ତ ଫେରାର ହୋଇଯାଇଥିବା ନେଇ ବଲାଣି ପୋଲିସ ସୂଚନା ଦେଇଛି । ସୂଚନାନୁସାରେ ଗତ ରାତି ବଲାଣି ପୋଲିସ ପେଟ୍ରୋଲିଂ କରୁଥିବା ସମୟରେ ଗୋଟିଏ ଗାଡି ଆତର୍କିତ ଭାବରେ ପଳାଇଯାଉଥିବା ସମୟରେ ପୋଲିସ କୁ ସନ୍ଦେହ ହୋଇଥିଲା । ସନ୍ଦେହରେ ଉକ୍ତ ଗାଡିକୁ ଅନୁସରଣ କରିଥିଲେ ତେବେ ଗାଡିଟି ପଳେଇ ଯିବାକୁ ସକ୍ଷମ ହୋଇଥିଲେ ସୁଦ୍ଧା ଭାଗ୍ୟକୁ ବଲାଣି ରେଳ ଫାଟକ ବନ୍ଦ ଥିବା ଯୋଗୁଁ ଉକ୍ତ ଗାଡିଟି ଆଗକୁ ଯିବାକୁ ସକ୍ଷମ ହୋଇନଥିଲା ଓ ରାସ୍ତା କଡରେ ଥିବା କାରୋ ପୋଲ ନିକଟରେ ଛପି ଥିବା ଅବସ୍ଥାରେ ପୋଲିସ ଘଟଣା ସ୍ଥଳରୁ ୩ ଗାଇଙ୍କୁ ଉଦ୍ଧାର କରିବା ସହିତ ଗୋରୁ ବୋଝେଇ ଗାଡିଟିକୁ ଜବତ କରିଛି । ତେବେ ଏ ନେଇ ବଲାଣି ଥାନାରେ କୌଣସି ମାମଲା ରୁଜ୍ଜୁ ହୋଇନଥିବା ନେଇ ବଲାଣି ପୋଲିସ କହିଥିବା ବେଳେ ଗୋରୁ ମାଲିକ ଏତଲା ଦେଲେ ମାମଲା ରୁଜ୍ଜୁ କରାଯିବ ବୋଲି କହିଛନ୍ତି । ତେବେ ପରିବହନ ବିଭାଗ ନିକଟରୁ ଗାଡି ତଥ୍ୟ ବାହାର କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ବଲାଣି ଥାନା ଅଧିଲାରୀ ବିଦେଶୀ ବାଘ କଗିଛନ୍ତି ।