ନବରଙ୍ଗପୁର, ନବରଙ୍ଗପୁର ଜିଲ୍ଲା ରାଇଘର ବ୍ଲକ ଅନ୍ତର୍ଗତ ଭାଟଭରାଣ୍ଡି ଗ୍ରାମପଚାଂୟତର ସିଉନାପାଲି ଗ୍ରାମରେ ଗତକାଲି ବିଳମ୍ବିତ ରାତିରେ ହାତୀ ଆକ୍ରମଣରେ ଜଣେ ବୃଦ୍ଧଙ୍କ ମୃତ୍ୟୁ ଘଟିଛି । ମୃତକଙ୍କ ନାମ କେଜୁ ଗଣ୍ଡ । ତାଙ୍କର ବୟସ ୬୦ ବର୍ଷରୁ ଉର୍ଦ୍ଧ୍ଵ ହେବ । ହାତୀପଲରେ ଥିବା ଏକ ହାତୀ ତାଙ୍କୁ ଶୁଣ୍ଡରେ ଉଠାଇ ତଳେ କଚାଡ଼ିବା ସହ ଦଳି ଦେବାରୁ ଘଟଣାସ୍ଥଳରେ ବୃଦ୍ଧଙ୍କ ମୃତ୍ୟୁ ଘଟିଛି ।
ବିଳମ୍ବିତ ରାତିରେ ଏକ ହାତୀପଲ ଗାଁକୁ ଆସିଥିଲେ । ଏହି ପଲରେ ୩୦ ରୁ ଉର୍ଦ୍ଧ୍ଵ ହାତୀ ଥିଲେ । ହାତୀ ପଲ ଘର ଭଙ୍ଗାରୁଜା କରୁଥିବା ଜାଣିବା ପରେ ଘର ଭିତରେ ପୁଅ ସହ ଶୋଇଥିବା ବୃଦ୍ଧ ଜଣକ ହାତୀ ଘଉଡାଇବାକୁ ବାହାରକୁ ଆସିଥିଲେ । ଏହି ସମୟରେ ହାତୀପଲରୁ ଏକ ହାତୀ ତାଙ୍କୁ ଆକ୍ରମଣ କରିଥିଲା । ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଛି । ଖବର ପାଇ ରାଇଘର ରେଞ୍ଜ୍ ବନ କର୍ମଚାରୀ ଘଟଣାସ୍ଥଳରେ ପହଂଚି ସ୍ଥିତିର ଅନୁଧ୍ୟାନ କରିଛନ୍ତି । ମୃତକଙ୍କ ଶବ ଜବତ କରାଯିବା ସହ ଏହାକୁ ବ୍ୟବଚ୍ଛେଦ ନିମନ୍ତେ ପଠାଯାଇଛି ।
