ଭୁବନେଶ୍ୱର, ଚାଷୀ ବିକ୍ରୟ କରୁଥିବା ଉତ୍ପାଦର ମୂଲ୍ୟ ଏବଂ ତାହାର ବଜାର ଦର ମଧ୍ୟରେ ମଧ୍ୟସ୍ଥତା ହଟାଯାଇପାରିଲେ ଚାଷୀର ଆୟ ବୃଦ୍ଧି ହୋଇପାରିବ । ଏହି ପ୍ରକ୍ରିୟାକୁ ତ୍ୱରାନ୍ୱିତ କରିବାକୁ ରାଜ୍ୟ ସରକାର ପ୍ରଥମ ଥର ପାଇଁ ରାଜ୍ୟରେ ଏଗ୍ରି-କନ୍କ୍ଲେଭ୍ ଏବଂ ଖାଦ୍ୟ ପ୍ରକ୍ରିୟାକରଣ ସଂସ୍ଥାଗୁଡ଼ିକର କନ୍କ୍ଲେଭ୍ ଆୟୋଜନ କରିଥିଲେ । ଚାଷୀମାନଙ୍କ ଖାଦ୍ୟଶୃଙ୍ଖଳରେ ରହିଥିବା ସମସ୍ୟାଗୁଡ଼ିକ ଉପରେ ଆଲୋଚନା କରି ତା’ର ନୂତନ ପଥ ବାଛିବା ନିମନ୍ତେ ଏସବୁ କନ୍କ୍ଲେଭ୍ ଉପଯୁକ୍ତ ମଂଚ ପ୍ରଦାନ କରିଥିଲା । ବିଗତ ବର୍ଷଗୁଡ଼ିକରେ କୃଷି ଓ କୃଷକଙ୍କୁ ନେଇ ହୋଇଥିବା ବିକାଶର ଚିତ୍ର ଆକଳନ କରିବା ନିମନ୍ତେ ମୁଖ୍ୟମନ୍ତ୍ରୀଙ୍କ ପ୍ରମୁଖ ପରାମର୍ଶଦାତା ଅସିତ ତ୍ରିପାଠୀଙ୍କ କାର୍ଯ୍ୟାଳୟରେ ଏକ ବୈଠକ ଅନୁଷ୍ଠିତ ହୋଇଥିଲା ।
ସିଧାସଳଖ ଚାଷୀଙ୍କଠାରୁ ଖାଦ୍ୟ ପ୍ରକ୍ରିୟାକରଣ ୟୁନିଟ୍ଗୁଡ଼ିକ ନିମନ୍ତେ କୃଷି ଉତ୍ପାଦ କ୍ରୟ କରୁଥିବା କୃଷି ଉଦ୍ୟୋଗୀମାନେ ୧୫ଟି ଖାଦ୍ୟ ପ୍ରକ୍ରିୟାକରଣ ସଂସ୍ଥା ସହ ସହବନ୍ଧନ କରିଛନ୍ତି । ବିଭିନ୍ନ ପେଶା, ବୟସ, ଶିକ୍ଷାଗତ ଯୋଗ୍ୟତା, ସ୍ଥାନ ଏବଂ କାର୍ଯ୍ୟର ପରିସର ନେଇ ଏହି କୃଷି ଉଦ୍ୟୋଗୀମାନଙ୍କ ମଧ୍ୟରେ ବିବିଧତା ପରିଲକ୍ଷିତ ହୋଇଥିଲା । ଏହି ଉଦ୍ୟୋଗୀ ଦଳରେ ବିଗ୍ ବାସ୍କେଟ, ଡିହାଟ୍, କଜାନନ୍ ଆଗ୍ରୋ ପ୍ରା. ଲିଃ, ଏକ୍ୱାର୍କ୍ସ ସିନରଜେଷ୍ଟିକ୍ ଆଗ୍ରିବିଜ୍ ନେସ୍ ନେଟ୍ ୱାର୍କସ୍ ପ୍ରା. ଲିଃ., ଫେଲିସ୍ ଲିଓ ଭେଂଚର୍ସ ପ୍ରା. ଲିଃ. ଏବଂ ଓରିଜିନ୍ସ୍, ମୟୂରଭଞ୍ଜ ଗ୍ରାଣ୍ଡ ପ୍ରା. ଲିଃ, ଆଗ୍ରିଲିଙ୍କ୍ ଫୁଡ୍ ପ୍ରସେସିଂ ପ୍ରା. ଲିଃ., ଏକେଏମ୍ ଆଗ୍ରୋ ପ୍ରସେସିଂ ପ୍ରା. ଲିଃ., ରିଲେଂଟନେସ୍ ଫୁଡସ୍ ପ୍ରା. ଲିଃ, ପ୍ରଣାମଫରୟୁ ଭେଞ୍ଜର୍ସ ପ୍ରା. ଲିଃ., ଭିଲ୍ଲା ମାର୍ଟ, ଆଗ୍ରିସୋଲ୍ ଅର୍ଗାନିକ୍ସ, ମହାଲକ୍ଷ୍ମୀ ଟ୍ରେଡିଂ ପରି ଓଡ଼ିଶାର ଷ୍ଟାର୍ଟଅପ୍ ମାନେ ରହିଛନ୍ତି । ଖୋର୍ଦ୍ଧା ଓ କଟକ ସହ କୋରାପୁଟ, ଢେଙ୍କାନାଳ, କନ୍ଧମାଳ, ମୟୂରଭଞ୍ଜ ଆଦି ଜିଲ୍ଲାର ଖାଦ୍ୟ ପ୍ରକ୍ରିୟାକରଣ ସଂସ୍ଥା ସହ ଏହି ଉଦ୍ୟୋଗୀମାନେ ସହବନ୍ଧନ କରିଛନ୍ତି । ଏହି ସଂସ୍ଥାଗୁଡ଼ିକ ମାଣ୍ଡିଆ, ମହୁ, ଲେମନ୍ଗ୍ରାସ୍, ମୋରିଙ୍ଗାଠାରୁ ଆରମ୍ଭ କରି କାଜୁବାଦାମ ଓ ଧାନ ପର୍ଯ୍ୟନ୍ତ ବିଭିନ୍ନ ଶସ୍ୟର ସଂଗ୍ରହଣ କରିବେ । ଅଣଧାନ ଉତ୍ପାଦ ମଧ୍ୟରେ ଲେମନ୍ ଗ୍ରାସ୍ ଚାଷ କରାଯାଇ ଆଦିବାସୀ ଅଧ୍ୟୁଷିତ ଅଂଚଳରେ ମଧ୍ୟ ରୂପାନ୍ତରଣ ସମ୍ଭବ ବୋଲି ବୈଠକରେ ପ୍ରକାଶ କରାଯାଇଥିଲା ।
ରୂପାନ୍ତରଣର ଯାତ୍ରାରେ ବିକାଶର ଅନେକ ସୁଯୋଗ ରହିଛି । ସେସବୁରେ ପ୍ରାଥମିକ ପ୍ରକ୍ରିୟାକରଣ, ପ୍ୟାକେଜିଂ ଏବଂ ମାନ ନିୟନ୍ତ୍ରଣର ଆବଶ୍ୟକତା ରହିଛି । ଅନ୍ୟଟି ହେଲା ସହବନ୍ଧନର ନିୟମ, ଲାଭ ସମ୍ବନ୍ଧରେ ସଚେତନତା ଏବଂ ପେଶାଦାର ପରିଚାଳନା । ଖାଦ୍ୟ ପ୍ରକ୍ରିୟାକରଣ ସଂସ୍ଥା, ଚାଷୀ ଏବଂ ସରକାରଙ୍କ ମଧ୍ୟରେ ଯୋଗସୂତ୍ର ବଳବତର ରହିଲେ ଚାଷୀଙ୍କ ଆୟକୁ ବୃଦ୍ଧି କରାଯାଇପାରିବ ବୋଲି ବିଶେଷଜ୍ଞମାନେ ମତ ରଖିଥିଲେ ।
