ଓଲଟିଲା ଗ୍ୟାସ୍ ଟ୍ୟାଙ୍କର : ଦୁର୍ଘଟଣା ପରେ ଟ୍ୟାଙ୍କରରୁ ପ୍ରଚୁର ଗ୍ୟାସ୍ ଲିକ୍

•  ଉଦ୍ଧାର କାର୍ଯ୍ୟ ଜାରୀ

ଭବାନୀପାଟଣା, ୧୬ ନଂ ଜାତୀୟ ରାଜପଥର କର୍ଲାପଡ଼ା ନିକଟସ୍ଥ ପାଷ୍ଟିପଡ଼ା ନିକଟରେ ଭାରସାମ୍ୟ ହରାଇ ରାସ୍ତା ଉପରେ ଓଲଟି ପଡିଛି ଏକ ଗ୍ୟାସ୍ ଟ୍ୟାଙ୍କର । ଆଜି ସକାଳେ ଭବାନୀପାଟଣାରୁ ରାୟପୁର ଅଭିମୁଖେ ଯାଉଥିବା ବେଳେ ଟ୍ୟାଙ୍କରଟି ଦୁର୍ଘଟଣାଗ୍ରସ୍ତ ହୋଇଛି । ଦୁର୍ଘଟଣା ପରେ ଟ୍ୟାଙ୍କରରୁ ପ୍ରଚୁର ଗ୍ୟାସ୍ ଲିକ୍ ହେଉଛି । ଖବର ପାଇ ଘଟଣାସ୍ଥଳରେ ଅଗ୍ନିଶମ ବାହିନୀ ପହଂଚି ସ୍ଥାନୀୟ ଲୋକଙ୍କୁ ଏନେଇ ସତର୍କ କରାଇବା ସହ ସ୍ଥିତିକୁ ଦୃଷ୍ଟିରେ ରଖି ବିଦ୍ୟୁତ କାଟ୍ କରିଛି । କୌଣସି ପ୍ରକାର ନିଆଁ ନଜାଳିବାକୁ ଆଖପାଖ ୫ଟି ଗ୍ରାମର ଲୋକଙ୍କୁ ପରାମର୍ଶ ଦିଆଯାଇଛି । ଦୀର୍ଘ ସମୟର ପ୍ରଚେଷ୍ଟା ପରେ ପ୍ରଥମେ ଗ୍ୟାସ୍ ଲିକ୍ କୁ ବନ୍ଦ କରିଛି ଅଗ୍ନିଶମ ବାହିନୀ । ବଲାଙ୍ଗିରରୁ ଏକ ବିଶେଷଜ୍ଞ ଦଳ ଘଟଣାସ୍ଥଳରେ ପହଂଚି ସ୍ଥିତି ଉପରେ ନଜର ରଖିଛନ୍ତି । ଅପରାହ୍ନ ୨ଟା ସୁଦ୍ଧା ଉଦ୍ଧାର କାର୍ଯ୍ୟ ଜାରୀ ରହିଛି ।

ଅନ୍ୟପକ୍ଷରେ ଏହି ଦୁର୍ଘଟଣା ଯୋଗୁଁ ଭବାନୀପାଟଣା – ରାୟପୁର ରୁଟ୍ ରେ ଦୀର୍ଘ ସମୟ ଧରି ଯାନବାହନ ଚଳାଚଳ ବ୍ୟାହତ ହୋଇଛି ।