ନୟାଗଡ଼, ବସ୍ ରେ ଭୁବନେଶ୍ଵର ଯାଉଥିବା ବେଳେ ସଡ଼କ ଦୁର୍ଘଟଣାରେ ଜଣେ ଶିକ୍ଷକଙ୍କ ମୃତ୍ୟୁ ଘଟିଛି । ଏଭଳି ଏକ ଦୁଃଖଦ ଘଟଣା ଘଟିଛି ନୟାଗଡ଼ ଜିଲ୍ଲାରେ । ମୃତ ଶିକ୍ଷକଙ୍କ ନାଁ ଅମର ଚାନ୍ଦ । ତାଙ୍କ ଘର ଜୁନାଗଡ଼ରେ । ସେ ଜୁନାଗଡ଼ରୁ ନୟାଗଡ଼ ଆସିଥିଲେ । ସେଠାରୁ ଆଜି ସକାଳେ ଏକ ଘରୋଇ ବସ୍ ରେ ଭୁବନେଶ୍ଵର ଯାଉଥିଲେ । ହେଲେ ଇଟାମାଟି ନିକଟ ଏକ ପେଟ୍ରୋଲ ପମ୍ପ ପାଖରେ ଛିଡ଼ା ହୋଇଥିବା ଟ୍ରକ୍ କୁ ବସ୍ ଟି ପଛରୁ ଧକ୍କା ଦେଇଥିଲା । ଫଳରେ ଘଟଣାସ୍ଥଳରେ ଶିକ୍ଷକ ଅମର ଚାନ୍ଦଙ୍କ ମୃତ୍ୟୁ ହୋଇଥିଲା । ଏହି ଦୁର୍ଘଟଣାରେ ଆଉ ୨ ଜଣ ଗୁରୁତର ହୋଇଛନ୍ତି । ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟରେ ପ୍ରାଥମିକ ଚିକିତ୍ସା ପରେ ସେମାନଙ୍କୁ ଭୁବନେଶ୍ଵର ସ୍ଥାନାନ୍ତରିତ କରାଯାଇଛି । ଦୁର୍ଘଟଣାଗ୍ରସ୍ତ ବସ୍ ର ସମ୍ମୁଖ ଭାଗ ସହିତ ଗୋଟିଏ ପାର୍ଶ୍ଵ ସମ୍ପୂର୍ଣ୍ଣ ଭାଙ୍ଗିରୁଜି ଯାଇଛି । ପୁଲିସ ଉଭୟ ଟ୍ରକ୍ ଓ ବସ୍ କୁ ଜବତ କରି ଘଟଣାର ତଦନ୍ତ କରୁଛି ।
