ଭବାନୀପାଟଣା, ଭବାନୀପାଟଣା ସଦର ବ୍ଲକ ବୋର୍ଡଆ ଫାଣ୍ଡି ଅନ୍ତର୍ଗତ ଡୁମୁରିଆ ରାସ୍ତା ଗଣ୍ଡବସା ନିକଟରେ ଏକ ବାଇକ ନମ୍ବର ଓଆର୦୩ଡି-୯୫୮୨ ଭାରସାମ୍ୟ ହରାଇ ଦୁର୍ଘଟଣାଗ୍ରସ୍ତ ହେବା ଫଳରେ ଏହାର ଚାଳକଙ୍କ ମୃତ୍ୟୁ ହୋଇଛି। ମୃତ ଯୁବକଙ୍କ ଘର ସଦର ବ୍ଲକ ସାଲେଗାଁରେ ଏବଂ ତାଙ୍କ ନାମ ଅଭୟ ସାହୁ ବୋଲି ଜଣାପଡିଛି।
ସୂଚନା ଅନୁସାରେ, କୌଣସି କାର୍ଯ୍ୟ ପାଇଁ ସେ ସ୍ଥାନୀୟ ଟିଟିଗାଁ ଯାଇ ନିଜ ଘର ସାଲେଗାଁକୁ ଫେରୁଥିବା ବେଳେ ଶନିବାର ବିଳମ୍ବିତ ରାତିରେ ଦୁର୍ଘଟଣାଗ୍ରସ୍ତ ହୋଇଥିଲେ। ରବିବାର ସକାଳେ ଗଣ୍ଡବସାର ଲୋକେ ଖବର ପାଇ ତୁରନ୍ତ ଘଟଣାସ୍ଥଳରେ ପହଞ୍ଚି ଡୁମୁରିଆ ସରପଞ୍ଚ ସଂଜୀବ ମିଶ୍ରଙ୍କୁ ଜଣାଇଥିଲେ। ସେ ବୋର୍ଡା ପୁଲିସ ଫାଣ୍ଡି ଅଧିକାରୀ ଚନ୍ଦ୍ର ହାସ୍ୟ ସାହୁଙ୍କୁ ଯୋଗାଯୋଗ କରିବା ପରେ ଫାଣ୍ଡି ଅଧିକାରୀ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ଅଧିକ ତଦନ୍ତ କରୁଥିବା ଜଣାପଡିଛି।
