ବାଲେଶ୍ଵର,ବାଲେଶ୍ଵର ଜିଲ୍ଲା ଜଳେଶ୍ଵର ଥାନା ଅନ୍ତର୍ଗତ ଲକ୍ଷ୍ମଣନାଥ ଟୋଲଗେଟ୍ ନିକଟରେ ୮ଟି ଗୋରୁ ବୋଝେଇ କଂଟେନରକୁ ଜବତ କରିବା ସହ ସେଥିରୁ ୫୦୦ରୁ ଅଧିକ ଗୋରୁଙ୍କୁ ଉଦ୍ଧାର କରିଛି ଜଳେଶ୍ଵର ପୋଲିସ । ଓଡ଼ିଶାରୁ ପଶ୍ଚିମବଙ୍ଗକୁ ଗୋରୁ ଚୋରା ଚାଲାଣ ହେଉଥିବା ବେଳେ ପୋଲିସ ହାତରେ ଧରାପଡିଛି ।
ପଶ୍ଚିମବଙ୍ଗକୁ ଲକ୍ଷ୍ମଣନାଥ ଟୋଲଗେଟ୍ ଦେଇ ଗୋରୁ ଚାଲାଣ ହେଉଥିବା ଜଳେଶ୍ଵର ପୁଲିସ କୌଣସି ସୂତ୍ରରୁ ଖବର ପାଇଥିଲା । ଗତକାଲି ବିଳମ୍ବିତ ରାତିରେ ପୁଲିସ ସେଠାରେ ଛକି ରହିଥିଲା । ଗୋରୁ ବୋଝେଇ କଂଟେନର ଗୁଡ଼ିକ ଲକ୍ଷ୍ମଣନାଥ ଟୋଲଗେଟ୍ ଦେଇ ଯିବାବେଳେ ପୁଲିସ ସେଗୁଡିକ ଅଟକାଇଥିଲା । ପୁଲିସ ୫ଟି କଂଟେନରକୁ ଜବତ କରିଥିଲା । ପୁଲିସକୁ ଚକମା ଦେଇ ଆଉ ୩ଟି ଗୋରୁ ବୋଝେଇ କଂଟେନର ଖସି ପଳାଇକୁ ଉଦ୍ୟମ କରିଥିଲେ । ପୋଲିସ ତାହାର ପିଛା କରି ଡେଲି ଗୋପୀନାଥ ଗାଁ ନିକଟରୁ ଏହି ୩ଟି କଂଟେନରକୁ ଜବତ କରିଥିଲା । ପୋଲିସ ୮ଟି କଂଟେନରରୁ ୫୦୦ରୁ ଅଧିକ ଗୋରୁଙ୍କୁ ଉଦ୍ଧାର କରିଥିଲା । ଘଟଣାରେ ୪ ଜଣ କଂଟେନର ଡ୍ରାଇଭରଙ୍କୁ ଥାନାରେ ଅଟକ ରଖି ପଚରା ଉଚୁରା ଚଳାଇଛି ପୋଲିସ ।
