ଜୟପୁର, କ୍ଷେତକୁ ପରିବା ତୋଳିବାକୁ ଯାଇଥିବା ବେଳେ କୂଅରେ ଗୋଡ଼ ଖସି ଜଣେ ମହିଳାଙ୍କ ମୃତ୍ୟୁ ଘଟିଛି । କୋରାପୁଟ ଜିଲ୍ଲା ଲମତାପୁଟ ବ୍ଲକ ଅନ୍ତର୍ଗତ ମାଲେଗାଁ ଗ୍ରାମରେ ଘଟିଯାଇଛି ଏଭଳି ଏକ ଦୁଃଖଦ ଘଟଣା । ମୃତ ମହିଳାଙ୍କ ନାମ ଭାବ ଦୋରା ।
ଆଜି ଲମତାପୁଟ ସାପ୍ତାହିକ ହାଟ ଥିବାରୁ ସକାଳୁ ସକାଳୁ ସ୍ଵାମୀ କୁଶଙ୍କ ସହ ଭାବ ପନିପରିବା ତୋଳିବା ପାଇଁ ଯାଇଥିଲେ । କିଛି ପରିବା ତୋଳିବା ପରେ ସ୍ଵାମୀ ପନିପରିବା ବିକ୍ରି ପାଇଁ ହାଟକୁ ଚାଲିଯାଇଥିଲେ । ହେଲେ ଭାବ ପରିବା ତୋଳୁ ତୋଳୁ ନିକଟରେ ଥିବା କୂଅରେ ଖସି ପଡ଼ିଥିଲେ । ଦୀର୍ଘ ସମୟ ଅପେକ୍ଷା ପରେ ଭାବ ଘରକୁ ଫେରି ନଥିବା ଦେଖି ସମ୍ପର୍କୀୟ ଖୋଜା ଖୋଜି କରିଥିଲେ । ପରେ କୂଅରେ ଭାବଙ୍କ ମୃତଦେହ ଭାସୁଥିବା ଦେଖିଥିଲେ । ତାଙ୍କୁ ତୁରନ୍ତ କୂଅରୁ ଉଦ୍ଧାର କରାଯାଇଥିଲେ ସୁଦ୍ଧା ସେତେବେଳକୁ ଭାବଙ୍କ ମୃତ୍ୟୁ ହୋଇଯାଇଥିଲା । ଖବର ପାଇ ଲମତାପୁଟ ଥାନା ପୋଲିସ ଘଟଣାସ୍ଥଳରେ ପହଂଚି ତଦନ୍ତ କରିଛି । ମୃତ ମହିଳାଙ୍କ ଶବ ଜବତ କରିବା ସହ ଏହାକୁ ବ୍ୟବଚ୍ଛେଦ ନିମନ୍ତେ ପଠାଇଛି । ପୋଲିସ ପକ୍ଷରୁ ଏନେଇ ଅଧିକ ତଦନ୍ତ ଜାରୀ ରହିଛି । ଅନ୍ୟପକ୍ଷରେ ମହିଳାଙ୍କ ଏଭଳି ଦୁଃଖଦ ମୃତ୍ୟୁକୁ ନେଇ ଗ୍ରାମରେ ଶୋକାକୂଳ ପରିବେଶ ସୃଷ୍ଟି ହୋଇଛି ।
