ଢ଼େଙ୍କାନାଳ – ଢ଼େଙ୍କାନାଳ ଜିଲ୍ଲା ମୋଟଙ୍ଗା ଥାନା ଅନ୍ତର୍ଗତ ବ୍ରାହ୍ମଣୀ ନଦୀର ଖଡ଼ଗପ୍ରସାଦ ଘାଟରେ ଡ଼ଙ୍ଗା ବୁଡି ଘଟଣାରେ ଆଜି ଆଉ ଜଣକର ମୃତଦେହ ଉଦ୍ଧାର ହୋଇଛି । ମୃତକ ହେଲେ ରୋଡ ଗାଁର ରମେଶ ସାହୁ । ସ୍ଥାନୀୟ ଲୋକେ ମୃତଦେହ ଭାସୁଥିବା ଦେଖି ପୋଲିସକୁ ଖବର ଦେଇଥିଲେ । ପୋଲିସ ଘଟଣାସ୍ଥଳରେ ପହଂଚି ମୃତଦେହ ଉଦ୍ଧାର କରିଥିଲା ।
ଗତକାଲି ଭୋର୍ ସମୟରେ ବାପୁନି ଆଚାର୍ଯ୍ୟଙ୍କ ମୃତଦେହ ପରଜଙ୍ଗ ଥାନା ଅନ୍ତର୍ଗତ ଗେଙ୍ଗୁଟିଆ ନିକଟରୁ ଉଦ୍ଧାର ହୋଇଥିଲା । ଏହି ଡ଼ଙ୍ଗା ବୁଡି ଘଟଣାରେ ଏବେ ବି ୨ ଜଣ ନିଖୋଜ ଅଛନ୍ତି । ନିଖୋଜ ଦ୍ୱୟ ହେଲେ ପରଜଙ୍ଗ ଥାନା ଅନ୍ତର୍ଗତ ରୋଡ ଗାଁର ସୁଶାନ୍ତ ସାହୁ ଏବଂ ଲୁଲୁ ସାହୁ । ପ୍ରକାଶ ଥାଉ କି, ଗତ ଶନିବାର ରାତି ପ୍ରାୟ ୮ଟା ସମୟରେ ବ୍ରାହ୍ମଣୀ ନଦୀର ଖଡ଼ଗପ୍ରସାଦ ଘାଟରୁ ଏକ ଦେଶୀ ଡ଼ଙ୍ଗାରେ ବିପଦସଙ୍କୁଳ ଅବସ୍ଥାରେ ଦୁଇ ଜଣ ନାଉରିଆଙ୍କ ସମେତ ୭ ଜଣ ଯାତ୍ରୀ ମୋଟ୍ ୯ ଜଣ ନଦୀ ପାର୍ ହେଉଥିଲେ । ହେଲେ ମଝି ନଈରେ ଡ଼ଙ୍ଗାଟି ଭାରସାମ୍ୟ ହରାଇ ବୁଡି ଯାଇଥିଲା । ୫ ଜଣ ପହଁରି ପହଁରି କୂଳକୁ ଆସି ଜୀବନ ବଂଚାଇ ଥିବା ବେଳେ ଘଟଣା ପର ଠାରୁ ଅନ୍ୟ ୪ ଜଣ ନିଖୋଜ ଥିଲେ । ପରେ ଦୁଇ ଜଣଙ୍କ ମୃତଦେହ ଉଦ୍ଧାର କରାଯାଇଥିବା ଏବେ ସୁଦ୍ଧା ଅନ୍ୟ ଦୁଇ ଜଣ ନିଖୋଜ ଅଛନ୍ତି ।
