ବାରିପଦା, ଏକ ପୁରୁଣା ଘରର ମାଟିକାନ୍ଥ ଭୁଶୁଡ଼ି ପଡିବାରୁ ୫ ବର୍ଷିୟା ନାବାଳିକାର ମୃତ୍ୟୁ ଘଟିଛି । ମୃତ ନାବାଳିକାଙ୍କ ନାମ ମୌସୁମୀ ମାଝି । ଆଜି ସକାଳେ ଏଭଳି ଏକ ଅଭାବନୀୟ ଘଟଣା ଘଟିଯାଇଛି ମୟୂରଭଞ୍ଜ ଜିଲ୍ଲା ଗୋରୁମହିସାଣି ଥାନା ଅନ୍ତର୍ଗତ କଳସିଭଙ୍ଗା ଗ୍ରାମରେ ।
ସୂଚନା ଅନୁଯାୟୀ, ରବିବାର ସକାଳେ ମୌସୁମୀ ଝଡ଼ିପୋକ ଧରିବା ପାଇଁ ଗାଁରେ ଥିବା ଏହି ପୁରୁଣା ଘର ନିକଟକୁ ଯାଇଥିଲେ । ସେହି ସମୟରେ ହଠାତ୍ ଏହି ଘରର ଦୁର୍ବଳ ଅବସ୍ଥାରେ ଥିବା ମାଟିକାନ୍ଥ ଭୁଶୁଡ଼ି ପଡିବାରୁ ମୌସୁମୀ କାନ୍ଥ ତଳେ ଚାପି ହୋଇଯାଇଥିଲେ । ପରିବାର ଲୋକେ ଓ ଗ୍ରାମବାସୀ ମୌସୁମୀଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ରାଇରଙ୍ଗପୁର ମେଡିକାଲରେ ଭର୍ତି କରିଥିଲେ । ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଗୋରୁମହିସାଣି ପୋଲିସ ନାବାଳିକାଙ୍କ ମୃତଦେହ ଜବତ କରିବା ସହ ଏହାକୁ ବ୍ୟବଚ୍ଛେଦ ନିମନ୍ତେ ପଠାଇଛି । ପୋଲିସ ପକ୍ଷରୁ ଏନେଇ ଅଧିକ ତଦନ୍ତ ଜାରୀ ରହିଛି ।
