କନ୍ଧମାଳ,ଆଜି ପ୍ରକାଶିତ ଓଡିଶା ପ୍ରଶାସନିକ ସେବା ପରୀକ୍ଷା (ଓଏଏସ)ରେ ସପ୍ତମ ସ୍ଥାନ ହାସଲ କରିଛନ୍ତି ଫୁଲବାଣୀର ଶୁଭଶ୍ରୀ ରଥ। ସ୍ଥାନୀୟ ଜିଲ୍ଲା ମୂଖ୍ୟ ଚିକିତ୍ସାଳୟର ବରିଷ୍ଠ ଫାର୍ମାସିଷ୍ଟ ଦୂର୍ଯ୍ୟୋଧନ ରଥ ଓ ସୁମତୀ ରଥଙ୍କ ଝିଅ ହେଉଛନ୍ତି ଶୁଭଶ୍ରୀ। ତୃତୀୟ ପ୍ରଚେଷ୍ଟାରେ ଏହି ସଫଳତା ହାସଲ କରିଛନ୍ତି ଶୁଭଶ୍ରୀ। ଶୁଭଶ୍ରୀ ନିଜର ସଫଳତାର ଶ୍ରେୟ ପିତାମାତା ଓ ଶିକ୍ଷକ ଶିକ୍ଷୟତ୍ରୀ ଓ ଶୁଭେଚ୍ଛୁ ମାନଙ୍କୁ ଦେଇଛନ୍ତି। ସ୍ଥାନୀୟ ସରକାରୀ ବାଳିକା ଉଚ୍ଚ ବିଦ୍ୟାଳୟରୁ କୃତିତ୍ଵର ସହ ମାଟ୍ରିକ ପାସ କରିବା ପରେ ଶୁଭଶ୍ରୀ ଫୁଲବାଣୀ ସ୍ଵୟଂଶାସିତ ମହାବିଦ୍ୟାଳୟରେ ଯୁକ୍ତ ଦୁଇ ପର୍ଯ୍ୟନ୍ତ ପଢିଥିଲେ। ଏହାପରେ ଭୁବନେଶ୍ଵର ଓଡିଶା କୃଷି ବିଶ୍ଵବିଦ୍ୟାଳୟର ମତ୍ସ୍ୟ ବିଜ୍ଞାନ ବିଭାଗରୁ ଅଧ୍ୟୟନ ଶେଷ କରିଛନ୍ତି। ଏବେ ସ୍ଵାସ୍ଥ୍ୟ ବିଭାଗରେ ଡାଟା ମ୍ୟାନେଜର ଭାବେ କାର୍ଯ୍ୟରତ ଅଛନ୍ତି ଶୁଭଶ୍ରୀ । ସେ ସରକାରୀ ଶିକ୍ଷାନୁଷ୍ଠାନରୁ ହିଁ ଶିକ୍ଷାଗତ ଯୋଗ୍ୟତା ହାସଲ କରିଛନ୍ତି । ଓଏଏସ ପରୀକ୍ଷାରେ କୃତିତ୍ଵ ହାସଲ କରିବା ପରେ ବିଭିନ୍ନ ମହଲରୁ ତାଙ୍କ ନିକଟକୁ ଶୁଭେଚ୍ଛାର ସୁଅ ଛୁଟିଛି । ପରିବାରର ପ୍ରେରଣା ସହ ନିଷ୍ଠା ଓ ଅଧ୍ୟବସାୟ ହିଁ ତାଙ୍କ ସଫଳତାର ଚାବିକାଠି ବୋଲି କହିବା ସହିତ ଆଗକୁ ମଧ୍ୟ ଏହା ବଜାୟ ରଖିବେ ବୋଲି କହିଛନ୍ତି ଶୁଭଶ୍ରୀ।
