ପୁରୀ, ବିଜୟା ଦଶମୀରେ ଶ୍ରୀମନ୍ଦିରରେ ଆଜି ଚତୁର୍ଦ୍ଧାମୂର୍ତିଙ୍କ ରାଜରାଜେଶ୍ଵର ବେଶ ଅନୁଷ୍ଠିତ ହୋଇଛି । ଶ୍ରୀଜୀଉଙ୍କ ଏହି ଦୁର୍ଲ୍ଲଭ ବେଶ ଦର୍ଶନ କରିବାକୁ ଶ୍ରୀମନ୍ଦିରରେ ଶ୍ରଦ୍ଧାଳୁଙ୍କ ଭିଡ଼ ଦେଖିବାକୁ ମିଳିଛି । ମହାପ୍ରଭୁଙ୍କ ଅବକାଶ ନୀତି ପରେ ଚନ୍ଦନ, ନୂଆ ଲୁଗା ଲାଗି ହୋଇଥିଲା । ୩୨ ମୂର୍ତି ସ୍ଵର୍ଣ୍ଣ ଅଳଙ୍କାରରେ ମହାପ୍ରଭୁଙ୍କୁ ଏହି ବେଶରେ ଭୂଷିତ କରାଯାଇଥିଲା । ମହାପ୍ରଭୁଙ୍କ ଚଳନ୍ତି ପ୍ରତିମା ମଦନମୋହନ, ରାମକୃଷ୍ଣ ବୀର ବେଶ ଧାରଣ କରି ଶ୍ରୀ ଜଗନ୍ନାଥ ବଲ୍ଲଭ ମଠ ସ୍ଥିତ ମହାଖଳା ବା ଦଶହରା ପଦାକୁ ବିଜେ କରିବେ । ସେଠାରେ ବିଭିନ୍ନ ଦଶହରା ନୀତି ଅନୁଷ୍ଠିତ ହେବ । ପରେ ଶ୍ରୀମନ୍ଦିରକୁ ଠାକୁର ମାନେ ବାହୁଡ଼ିବେ । ଆସନ୍ତା କାଲି ଶ୍ରୀକ୍ଷେତ୍ରର ବିଭିନ୍ନ ସାହିର ପୂଜା ମଣ୍ଡପରୁ ଦେବୀଙ୍କ ମୃଣ୍ମୟୀ ମୂର୍ତି ମେଢ଼ ସହ ପଟୁଆରରେ ଆସି ସିଂହଦ୍ଵାରରେ ଗୋଷାଣି ଯାତରେ ବିଜେ କରିବେ । ସେହିପରି ଆସନ୍ତା କାଲି ଠାରୁ ଶ୍ରୀମନ୍ଦିରରେ କାର୍ତିକ ନୀତି ଆରମ୍ଭ ହେବ ।
