କନ୍ଧମାଳ, ବେଆଇନ ଗୋଚାଲାଣ ହେଉଥିବା ଏକ ଡାଲା ଅଟୋ ଗାଡିକୁ ଜବତ କରିଛି କନ୍ଧମାଳ ଜିଲ୍ଲା ଦାରିଙ୍ଗବାଡି ଥାନା ପୁଲିସ। ଅଟୋରୁ ୪ ଟି ଗାଇକୁ ଉଦ୍ଧାର କରିଛି । ସିମନବାଡ଼ି ବଜାର ନିକଟରେ ଦେଖିବାକୁ ମିଳିଛି ଏଭଳି ଘଟଣା ।
ସୂଚନା ଅନୁସାରେ, କିରୀକୁଟି ପଞ୍ଚାୟତ ସ୍ଥିତ କନ୍ଦିବାନ୍ଦା ଗ୍ରାମରୁ ଦନେକବାଡ଼ି ପଞ୍ଚାୟତ କୁପିବାଡ଼ି ଗ୍ରାମକୁ ଏକ ଅଟୋ ଯୋଗେ ଗୋ ଚାଲାଣ ହେଉଥିବା ବେଳେ ସିମନବାଡ଼ି ବଜାରରେ ପୋଲିସକୁ ଦେଖି ଗାଡ଼ିକୁ ଏକ ଗଳି ରାସ୍ତାରେ ନେଇ ଲୁଚାଇ ରଖିବାକୁ ଉଦ୍ୟମ କରିଥିଲା ଡ୍ରାଇଭର। ତେବେ କୌଣସି ସୂତ୍ରରୁ ଖବର ପାଇ ଦାରିଙ୍ଗବାଡି ଥାନା ଅଧିକାରୀ କୌଶିକ ମାଝୀଙ୍କ ନିର୍ଦ୍ଦେଶ କ୍ରମେ ଏଏସଆଇ ଏସ. ଶ୍ରୀନିବାସ ରାଓଙ୍କ ସହ ପୁଲିସ ଟିମ୍ ପହଂଚି ଅଟୋକୁ ଜବତ କରିବା ସହ ୪ଟି ଗାଇକୁ ଉଦ୍ଧାର କରିଥିଲେ। ଚାଲାଣକାରୀ ଜଣକ କୁପିବାଡ଼ି ଗ୍ରାମର ରିକାର୍ଦ ନାୟକ ବୋଲି ଜଣାପଡ଼ିଥିବା ବେଳେ ଅଟୋ ଡ୍ରାଇଭର ଫେରାର ହେବାରେ ସକ୍ଷମ ହୋଇଛି । ତେବେ ରିକାର୍ଦକୁ ପୁଲିସ ଅଟକ ରଖି ପଚରାଉଚରା କରୁଛି।ଏନେଇ ଅଧିକ ତଦନ୍ତ କରୁଥିବା ଥାନା ଅଧିକାରୀ ସୂଚନା ଦେଇଛନ୍ତି।
