-
ଆଗାମୀ ୩ ବର୍ଷରେ ୨୫ ଲକ୍ଷ ପ୍ରଶିକ୍ଷକ ପ୍ରସ୍ତୁତ କରିବା-ଧର୍ମେନ୍ଦ୍ର ପ୍ରଧାନ
-
ପ୍ରଧାନମନ୍ତ୍ରୀଙ୍କ ଭାରତକୁ ସ୍କିଲ୍ ହବ୍ କରିବା କଳ୍ପନାକୁ ସାକାର କରିବାକୁ ହେବ
ନୂଆଦିଲ୍ଲୀ/ଭୁବନେଶ୍ୱର, କେନ୍ଦ୍ର ଶିକ୍ଷା, ଦକ୍ଷତା ବିକାଶ ଏବଂ ଉଦ୍ୟମିତା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ସୋମବାର ନୂଆଦିଲ୍ଲୀ ଠାରେ ‘ସ୍କିଲ୍ ମନ୍ଥନ’ କର୍ମଶାଳାରେ ଯୋଗଦେଇ ଆଗାମୀ ୩ ବର୍ଷରେ ୨୫ ଲକ୍ଷ ପ୍ରଶିକ୍ଷକ ପ୍ରସ୍ତୁତ କରିବା ପାଇଁ ଆହ୍ୱାନ କରିଛନ୍ତି ।
ଦକ୍ଷତା ବିକାଶ ଏବଂ ଉଦ୍ୟମିତା ମନ୍ତ୍ରଣାଳୟ ଅଧୀନରେ ଆୟୋଜିତ ଏହି କର୍ମଶାଳାରେ ଯୋଗଦେଇ ଶ୍ରୀ ପ୍ରଧାନ କହିଛନ୍ତି ଯେ ଟେକ୍ନୋଲୋଜି ଆମର ବିଶ୍ୱକୁ କ୍ରମାଗତ ଭାବେ ବଦଳାଉଛି । ଶିକ୍ଷାରୁ ସ୍ୱାସ୍ଥ୍ୟ, କୃଷିରୁ ସବୁ ଆର୍ଥିକ କ୍ଷେତ୍ର ଟେକ୍ନୋଲୋଜି ଦ୍ୱାରା ବିକଶିତ ହେଉଛି । ଏହା ନୂଆ ସୁଯୋଗ ଏବଂ ନୂଆ ଦକ୍ଷତା ଦୃଶ୍ୟପଟ୍ଟରେ ଆବଶ୍ୟକ ଥିବା ସୁଯୋଗ ସୃଷ୍ଟି କରୁଛି ।
ଆମକୁ ଆଗାମୀ ୩ ବର୍ଷ ମଧ୍ୟରେ ୨୫ ଲକ୍ଷ ପ୍ରଶିକ୍ଷକ ପ୍ରସ୍ତୁତ କରିବାକୁ ହେବ । ସ୍କିଲ ଇଣ୍ଡିଆ ଅଧୀନ ପ୍ରଶିକ୍ଷଣ କେନ୍ଦ୍ର ଗୁଡ଼ିକ ପ୍ରଭାବଶାଳୀ ପ୍ରଶିକ୍ଷକଙ୍କ ବିକାଶ ପାଇଁ ଏକ ହଟସ୍ପଟ୍ ହେବ, ଯେଉଁମାନେ ଆଗାମୀ ପିଢିର ଶ୍ରମ ସମ୍ବଳ ପ୍ରସ୍ତୁତ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବେ ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭାରତକୁ ଏକ ସ୍କିଲ୍ ହବ୍ କରିବା ପାଇଁ କଳ୍ପନା ରଖିଛନ୍ତି । ଆମର କୌଶଳ ପରିସଂସ୍ଥାନକୁ ମଜବୁତ୍ କରିବା ଏବଂ ଭାରତକୁ ବିଶ୍ୱର ଦକ୍ଷତା କ୍ଷେତ୍ରର କେନ୍ଦ୍ରବିନ୍ଦୁ କରିବା ଦିଗରେ ଏକ ନୂତନ ଆଭିମୁଖ୍ୟ ଆଣିବା ପାଇଁ ଆନୁଷ୍ଠାନିକ ସଂସ୍କାର, ସୃଜନାତ୍ମକ ଚିନ୍ତାଧାରା, ଆନ୍ତର୍ଜାତୀୟ ସହଯୋଗ, ଟେକ୍ନୋଲୋଜିର ବ୍ୟବହାର ପାଇଁ ଶ୍ରୀ ପ୍ରଧାନ ଆହ୍ୱାନ କରିଛନ୍ତି
