ବାରିପଦା, ବାପାକୁ ଗୁଳି କରି ହତ୍ୟା କରିଛି ନୃଶଂସ ପୁଅ । ଏଭଳି ଘଟଣା ଘଟିଛି ମୟୂରଭଞ୍ଜ ଜିଲ୍ଲା ଉଦଳା ଥାନା ଅନ୍ତର୍ଗତ କାଶୀକୁଣ୍ଡଳ ଗାଁରେ । ମୃତ ବ୍ୟକ୍ତି ଜଣକ ହେଲେ ଟିଲୁ ନାଏକ । ଅଭିଯୁକ୍ତ ପୁଅ କୈଳାଶ ନାଏକ ଘଟଣା ପରେ ଫେରାର୍ ହୋଇଯାଇଛି ।
ଗତକାଲି ରାତିରେ କୌଣସି କଥାକୁ ନେଇ ବାପା ଓ ପୁଅଙ୍କ ମଧ୍ୟରେ ବଚସା ହୋଇଥିଲା । କୈଳାଶ ହଠାତ୍ ଉତକ୍ଷିପ୍ତ ହୋଇ ଶିକାର ପାଇଁ ଘରେ ରଖିଥିବା ଦେଶୀ ବନ୍ଧୁକ ଆଣିନିଜ ବାପାକୁ ଗୁଳି କରିଥିଲା । ଫଳରେ ଘଟଣାସ୍ଥଳରେ ହିଁ ଟିଲୁଙ୍କର ମୃତ୍ୟୁ ଘଟିଥିଲା । ବାପାକୁ ହତ୍ୟା କରିବା ପରେ କୈଳାଶ ଘଟଣାସ୍ଥଳରୁ ଫେରାର ହୋଇଯାଇଥିଲା । ଖବର ପାଇ ଆଜି ସକାଳେ ପୋଲିସ ଓ ସାଇଂଟିଫିକ୍ ଟିମ୍ ସେଠାରେ ପହଂଚି ଘଟଣାର ତଦନ୍ତ କରିଛନ୍ତି । ପୁଲିସ ଅଭିଯୁକ୍ତକୁ ଗିରଫ କରିବା ପାଇଁ ଉଦ୍ୟମ ଚଳାଇଛି ।
ଏଠାରେ ଉଲ୍ଲେଖଯୋଗ୍ୟ, ଶିମିଳିପାଳ ଅଭୟାରଣ୍ୟରେ ବେଆଇନ ଶିକାର ପାଇଁ କେତେକ ଲୋକ ଘରେ ବନ୍ଧୁକ ରଖିଛନ୍ତି । ପ୍ରଶାସନ ପକ୍ଷରୁ ଏନେଇ ଛାନଭିନ୍ ଜୋରଦାର୍ କରାଯାଉନଥିବାରୁ ଅନେକ ସମୟରେ ଏଭଳି ଘଟଣା ସାମ୍ନାକୁ ଆସୁଛି । ତେଣୁ ଆଗାମୀ ଦିନରେ ପ୍ରଶାସନ ଏ ଦିଗରେ ଦୃଷ୍ଟି ଦେବାକୁ ଦାବି ହେଉଛି ।
