ବଲାଙ୍ଗିର, ଟ୍ରକକୁ ପିଟି ଫେରାର ମାରିଲା ଅଜଣା ଗାଡି । ଫଳରେ ଡ୍ରାଇଭରର ମୃତ୍ୟୁ ଘଟିଛି । ଏପରି ଏକ ଘଟଣା ଘଟିଛି ବଲାଙ୍ଗିର-ସମ୍ବଲପୁର ଏନ.ଏଚ ୨୬ ର ଛତାମଖନା ଛକ ନିକଟରେ ।
ଗତକାଲି ବିଳମ୍ବିତ ରାତିରେ ଏକ ଲାଇନ ଟ୍ରକ ବଲାଙ୍ଗିରରୁ ବରଗଡ ପଟକୁ ଯାଉଥିଲା । ଛତାମଖନା ଠାରେ ସାମ୍ନା ପଟୁ ଆସୁଥିବା ଏକ ଅଜଣା ଗାଡି ଏହାକୁ ଧକ୍କା ଦେଇ ଫେରାର ହୋଇଯାଇଥିଲା। ଅଜଣା ଗାଡିଟି ଆଉ ଏକ ଟ୍ରକ ହୋଇଥିବା ଅନୂମାନ କରାଯାଉଛି । ଡ୍ରାଇଭର ଜଣକ ଭଙ୍ଗା କେବିନରେ ଚାପି ହୋଇ ଯାଇଥିଲେ । ଲୋଇସିଂହା ଏବଂ ବଲାଙ୍ଗିର ଅଗ୍ନିଶମ ବିଭାଗ ଘଟଣାସ୍ଥଳରେ ପହଞ୍ଚି କଟର ସାହାଯ୍ୟରେ କେବିନକୁ କାଟି ଅଚେତ ଅବସ୍ଥାରେ ଥିବା ଡ୍ରାଇଭରକୁ ବାହାର କରିଥିଲେ । ଗୁରୁତର ଅବସ୍ଥାରେ ଅଗ୍ନିଶମ ବିଭାଗ ଡ୍ରାଇଭର ଜଣକୁ ବଲାଙ୍ଗିର ଭୀମଭୋଇ ମେଡିକାଲ କଲେଜ ହସପିଟାଲରେ ଭର୍ତ୍ତି କରିଥିଲେ । ପରେ ଡାକ୍ତର ଡ୍ରାଇଭର ଜଣକୁ ମୃତ ଘୋଷଣା କରିଥିଲେ । ମୃତ ଡ୍ରାଇଭରଙ୍କ ପରିଚୟ ମିଲିପାରିନାହିଁ । ବଲାଙ୍ଗିର ପୋଲିସ ଘଟଣାର ତଦନ୍ତ ଚଳାଇଛି।
