ଯାଜପୁର, ଗୁଣିଗାରେଡ଼ିକୁ କେନ୍ଦ୍ର କରି ତାନ୍ତ୍ରିକ ବେକକୁ ଧାରୁଆ ଅସ୍ତ୍ରରେ ହାଣି ହତ୍ୟା କରିଛି ଯୁବକ । ଯାଜପୁର ଜିଲା ସୁକିନ୍ଦା ଥାନା ଅନ୍ତର୍ଗତ ବନ୍ଧଗାଁରେ ଘଟିଯାଇଛି ଏଭଳି ଏକ ହତ୍ୟାକାଣ୍ଡ । ଘଟଣା ପରେ ଅଭିଯୁକ୍ତ ଶାନ୍ତନୁ ବେହେରା ସୁକିନ୍ଦା ଥାନାରେ ପୋଲିସ ନିକଟରେ ଆତ୍ମସମର୍ପଣ କରିଛି । ହତ୍ୟାରେ ବ୍ୟବହୃତ ଅସ୍ତ୍ରକୁ ମଧ୍ୟ ପୋଲିସ ତା ନିକଟରୁ ଜବତ କରିଛି । ତେବେ ମୃତକଙ୍କ ପରିଚୟ ଅସ୍ପଷ୍ଟ ରହିଛି । ପୋଲିସ ସେନେଇ ଅଧିକ ତଦନ୍ତ ଚଳାଇଛି ।
ଅଭିଯୁକ୍ତ ଶାନ୍ତନୁଙ୍କ ପତ୍ନୀ ତାଙ୍କୁ ଛାଡି ବାପଘରେ ରହୁଛନ୍ତି । ଶାଶୂଘରକୁ ପତ୍ନୀଙ୍କୁ ଫେରାଇ ଆଣିବାକୁ ସେ ତାନ୍ତ୍ରିକର ସହାୟତା ନେଇଥିଲେ । ହେଲେ ତାଙ୍କୁ ତାନ୍ତ୍ରିକ ଦେଇଥିବା ମନ୍ତ୍ର କାମ ନଦେବାରୁ ଠକେଇରେ ପଡିଥିବା ଭାବି ଶେଷରେ ତାନ୍ତ୍ରିକକୁ ହତ୍ୟା କରିଛି ଯୁବକ । ଅନ୍ୟପକ୍ଷରେ ଏନେଇ ତାନ୍ତ୍ରିକ ଯୁବକଙ୍କୁ ବାରମ୍ବାର ଟଙ୍କା ଦାବି କରି ଆସୁଥିଲା । ଆଜି ପୁଣି ଆସି ଟଙ୍କା ମାଗିବା ବେଳେ ଉତକ୍ଷିପ୍ତ ଯୁବକ ଜଣକ ଏକ ଧାରୁଆ ଅସ୍ତ୍ରରେ ତାକୁ ଆକ୍ରମଣ କରିଥିବା ଜଣାପଡିଛି ।
