-
ଶ୍ୱାସରୁଦ୍ଧ ହୋଇ ଶୁଭଶ୍ରୀ ମହାପାତ୍ରଙ୍କ ମୃତ୍ୟୁ
ଭୁବନେଶ୍ୱର, ରାଜଧାନୀର ଶାସ୍ତ୍ରୀନଗରର ଶୁଭଶ୍ରୀ ମହାପାତ୍ରଙ୍କ ମୃତ୍ୟୁ ଏବେ ଶବ ବ୍ୟବଚ୍ଛେଦ ରିପୋର୍ଟ ଆସିଛି । ଶୁଭଶ୍ରୀଙ୍କ ମୃତ୍ୟୁ ଶ୍ୱାସରୁଦ୍ଧ ଯୋଗୁ ହୋଇଥିବା ରିପୋର୍ଟରେ ଦର୍ଶା ଯାଇଛି । ଏହାଛଡ଼ା ଝୁଲନ୍ତା ଅବସ୍ଥାରେ ଶୁଭଶ୍ରୀଙ୍କ ମୃତ୍ୟୁ ହୋଇଥିବା ରିପୋର୍ଟରେ ଉଲ୍ଲେଖ ରହିଛି । ପୁଲିସକୁ ଶବ ବ୍ୟବଚ୍ଛେଦ ରିପୋର୍ଟ ହସ୍ତାନ୍ତର କରାଯାଇଛି ।
ସେହିପରି ତେବେ ମୃତ୍ୟୁ ପୂର୍ବରୁ ଶୁଭଶ୍ରୀ କୌଣସି ବିଷାକ୍ତ ଖାଦ୍ୟ ଖାଇଥିଲେ କି ନାହିଁ, ତାର ଯାଂଚ ପାଇଁ ରାଜ୍ୟ ଫରେନସିକ ଲାବକୁ ନମୁନା ପଠାଯାଇଛି ।
ସୂଚନାଯୋଗ୍ୟ ବୁଧବାର ଦିନ ଖାରବେଳନଗର ଥାନା ଅନ୍ତର୍ଗତ ଶାସ୍ତ୍ରୀନଗର ଅଂଚଳରେ ଘର ଭିତରୁ ଶୁଭଶ୍ରୀଙ୍କ ମୃତଦେହ ଠାବ ହୋଇଥିଲା । ତାଙ୍କ ବେକରେ ଦାଗ ଥିବା ବେଳେ ଶରୀରର ବିଭିନ୍ନ ସ୍ଥାନରେ କ୍ଷତ ଚିହ୍ନ ରହିଥିଲା । ଏହାସହ ଘରର ଆସବାବପତ୍ର ମଧ୍ୟ ଛିନଛତ୍ର ହୋଇ ପଡି ରହିଥିବା ଦେଖିବାକୁ ମିଳିଥିଲା । ଘରେ ସ୍ୱାମୀ ଓ ପୁଅ ନଥିବା ବେଳେ କେହି ତାଙ୍କୁ ହତ୍ୟା କରିଥିବା ଅଭିଯୋଗ ହୋଇଥିଲା ।
ଏହି ମାମଲାରେ ପୋଲିସ୍ ଜଣେ ଯୁବକଙ୍କୁ ଅଟକ ରଖିଛି । ଅଟକ ଥିବା ଯୁବକଙ୍କୁ ମୃତ୍ୟୁ ଦିନ ଶୁଭଶ୍ରୀ ଫୋନ୍ କରିଥିଲେ ବୋଲି ସୂଚନା ମିଳିଛି । ଶୁଭଶ୍ରୀଙ୍କ ଫୋନ୍ ନମ୍ବରରୁ ସମ୍ପୃକ୍ତ ଯୁବକଙ୍କ ପାଖକୁ ବାରମ୍ବାର କଲ୍ ଯାଇଥିଲା । ଏପରିକି ମୃତ୍ୟୁର ଅଧ ଘଂଟା ପୂର୍ବରୁ ଶୁଭଶ୍ରୀଙ୍କ ଫୋନ୍ ନମ୍ବରରୁ ଉକ୍ତ ଯୁବକଙ୍କ ପାଖକୁ ଶେଷ କଲ୍ ଯାଇଥିଲା । ଶେଷ କଲ୍ ୨୭ ସେକେଣ୍ଡର ଥିଲା । ଶେଷ କଲ୍ ପୂର୍ବରୁ ସେଦିନ ୭ରୁ ଅଧିକ ଥର ଶୁଭଶ୍ରୀ ଯୁବକ ଜଣଙ୍କୁ କଲ୍ କରିଥିଲେ । ଅନ୍ୟପକ୍ଷରେ ଅଟକ ଥିବା ଯୁବକଙ୍କୁ ଶୁଭଶ୍ରୀଙ୍କ ସ୍ୱାମୀ ଚିହ୍ନିଥିବା ମଧ୍ୟ ଜଣାପଡ଼ିଛି ।
