ନୂଆଦିଲ୍ଲୀ ,ଅକ୍ଟୋବର ୧୭ରେ ହେବ କଂଗ୍ରେସ ଅଧ୍ୟକ୍ଷ ନିର୍ବାଚନ । ଅକ୍ଟୋବର ୧୯ରେ ନୂଆ କଂଗ୍ରେସ ଅଧ୍ୟକ୍ଷଙ୍କ ନାଁ ଘୋଷଣା ହେବ । ସେପ୍ଟେମ୍ବର ୧୭ରୁ ନିର୍ବାଚନ ପ୍ରକ୍ରିୟା ଆରମ୍ଭ ହେବ । ନିର୍ବାଚନ ନେଇ ସିଡବ୍ଲୁସି ବୈଠକରେ ନିଷ୍ପତି ନିଆଯାଇଛି ।ସେପ୍ଟେମ୍ବର ୨୨ରେ ବିଜ୍ଞପ୍ତି ପ୍ରକାଶ ପାଇବ । ସଭାପତି ପଦ ପାଇଁ ସେପ୍ଟେମ୍ବରର ୨୪ରୁ ସେପ୍ଟେମ୍ବର ୩୦ ଭିତରେ ନାମାଙ୍କନ ଦାଖଲ କରାଯିବ । ଅକ୍ଟୋବର ୮ ରହିବ ନାମାଙ୍କନ ପ୍ରତ୍ୟାହାରର ଶେଷଦିନ ବୋଲି ଦଳର ସାଧାରଣ ସଂପାଦକ କେ. ସି. ବେଣୁଗୋପାଳ ଘୋଷଣା କରିଛନ୍ତି ।
ଆଜି ବସିଥିବା କଂଗ୍ରେସ କାର୍ଯ୍ୟକାରୀ କମିଟି ବୈଠକରେ ସଭାପତି ନିର୍ବାଚନ ଲାଗି ଚୂଡ଼ାନ୍ତ ନିଷ୍ପତି ହୋଇଛି । ଚିକିତ୍ସା ପାଇଁ ବିଦେଶରେ ଥିବା ସୋନିଆ ଗାନ୍ଧି ଏହି ବୈଠକରେ ଭିଡିଓ କନଫରେନସିଂରେ ସାମିଲ ହୋଇ ଅଧ୍ୟକ୍ଷତା କରିଥିଲେ । ଏହା ବ୍ୟତୀତ ସେପ୍ଟେମ୍ବର ୪ରେ ଦିଲ୍ଲୀରେ ମେହେଙ୍ଗାଇ ପର ହଲ୍ଲା ବୋଲ୍ ରାଲି, ସେପ୍ଟେମ୍ବର ୭ରୁ ଭାରତ ଯୋଡ଼ ଶୋଭାଯାତ୍ରା କରିବା ନେଇ କାର୍ଯ୍ୟକାରୀ କମିଟି ବୈଠକରେ ନିଷ୍ପତି ହୋଇଛି ।
