ମାଲକାନଗିରି, ମାଲକାନଗିରି ଜିଲ୍ଲା କାଲିମେଳା ଥାନା ପୋଲିସ ଏକ ଟାଟା ମ୍ୟାଜିକ ଗାଡି ଯୋଗେ ଦେଶୀ ମଦ ଚାଲାଣ ହେଉଥିବା ବେଳେ ଚଢାଉ କରି ମଦ ସହ ଗାଡିକୁ ଜବତ କରିଛି। ଦେଶୀ ମଦ ଚାଲାଣ ଅଭିଯୋଗରେ ୨ ଅଭିଯୁକ୍ତଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଥିବା ଜଣାପଡିଛି।
କାଲିମେଳା ଥାନା ପକ୍ଷରୁ ମିଳିଥିବା ସୂଚନା ଅନୁଯାୟୀ, କାଲିମେଳା ଅଗ୍ନିଶମ କାର୍ଯ୍ୟାଳୟ ନିକଟରେ ପୋଲିସ ବିଭାଗ ପକ୍ଷରୁ କରାଯାଇଥିବା ଚେକ ପୋଷ୍ଟ ଠାରେ ଥାନା ସବଇନ୍ସପେକ୍ଟର ଲକ୍ଷ୍ମୀଧର ଲେଙ୍କାଙ୍କ ସହ ସୁରେଶ ଚନ୍ଦ୍ର ମାଝୀ କନେଷ୍ଟବଳ ପବିତ୍ର କୁମାର ବେହେରା ରାତ୍ର ଡିଉଟି କରୁଥିବା ସମୟରେ ଏକ ଲାଲ ରଙ୍ଗର ଓଡି ୩୦ ୯୮୯୭ ନମ୍ବର୍ ଥିବା ଟାଟା ମ୍ୟାଜିକ ଗାଡି ଆସୁଥିବା ଦେଖି ପୋଲିସ କର୍ମଚାରୀ ମାନେ ଗାଡିକୁ ଯାଞ୍ଚ କରିଥିଲେ। ଗାଡି ଯାଞ୍ଚ କରିବା ପରେ ପ୍ଲାଷ୍ଟିକ ଜାରକିନ ଡବାରେ କିଛି ତରଳ ପଦାର୍ଥ ଥିବା ଦେଖୁ ପୋଲିସ କର୍ମଚାରିଙ୍କ ସନ୍ଦେହ ହେବାରୁ ଅଧିକ ଯାଞ୍ଚ ପରେ ସେଥୁରେ ଦେଶୀ ମଦ ଥିବା ଜାଣିବାକୁ ପାଇଥିଲେ । ଏହି ମଦ କାରବାରରେ ସମ୍ପୃକ୍ତି ଥିବା ମୋଟୁ ଅଞ୍ଚଳର ଆନ୍ଦା ମାଢି ଓ ମନୋଜ ସୋଡ଼ୀ ନାମକ ୨ ବ୍ୟକ୍ତିକୁ ଗିରଫ କରାଯାଇଛି I ଗାଡି ଭିତରୁ ମୋଟ ୪୩୦ ଲିଟର ମଦ ଜବତ କରାଯାଇଛି । ଶିଖପଲ୍ଲୀ ଏମ ଭି ୧୭ ଗାଁ ନିକଟରୁ ମୋଟୁ ଅଞ୍ଚଳକୁ ଏହି ମଦ ଯାଉଥିବା ଗିରଫ ଅଭିଯୁକ୍ତ ମାନେ ପ୍ରକାଶ କରିଛନ୍ତି । ପୋଲିସ ଏକ ମାମଲା ରୁଜୁ କରି ଅଧିକ ତଦନ୍ତ ଜାରି ରଖିଛି। ଥାନା ସବଇନ୍ସପେକ୍ଟର ସଞ୍ଜୟ କୁମାର ବଡସେଠୀ ଏହି ଘଟଣାର ତଦନ୍ତ କରୁଛନ୍ତି ।
