ଭୁବନେଶ୍ୱର, ସ୍ୱାଧୀନତାର ଅମୃତ ମହୋତ୍ସବ ଅବସରରେ ରୋଟାରୀ ପକ୍ଷରୁ ଏକ ମେଗା ତ୍ରିରଙ୍ଗା ଶୋଭାଯାତ୍ରା ଆୟୋଜିତ ହୋଇଯାଇଛି । ଭୁବନେଶ୍ୱରସ୍ଥିତ ରୂପାଲି ଛକଠାରୁ ବାହାରିଥିବା ଏହି ଶୋଭାଯାତ୍ରା ବାଣୀବିହାର ଛକ, ପରିକ୍ରମା କରି ରମାଦେବୀ କଲେଜ ଛକରେ ପହଂଚିଥିଲା । ଏଥିରେ ସହସ୍ରାଧିକ ଛାତ୍ରଛାତ୍ରୀଙ୍କ ସମେତ ବିଭିନ୍ନ କ୍ଲବର ରୋଟାରିୟାନମାନେ ହାତରେ ତ୍ରିରଙ୍ଗା ପତାକା ଧରିବା ସହ ଦୁଇଶହ ମିଟର ଲମ୍ବ ଏକ ଜାତୀୟ ପତାକାକୁ ପ୍ରଦର୍ଶନ ପୂର୍ବକ ଯାତ୍ରାରେ ଅଂଶଗ୍ରହଣ କରିଥିଲେ ।
କାର୍ଯ୍ୟକ୍ରମ ପ୍ରାରମ୍ଭରୁ ଜାତୀୟତାବୋଧ ସମ୍ପର୍କରେ ସମବେତ ଛାତ୍ରଛାତ୍ରୀମାନଙ୍କୁ ପଥପ୍ରାନ୍ତ ସଭା ମାଧ୍ୟମରେ ସଚେତନ କରାଯାଇଥିଲା । ୨୦୨୩-୨୪ ରୋଟାରୀ ବର୍ଷର ପ୍ରାନ୍ତପାଳ ରୋଟାରିୟାନ ଯଜ୍ଞାଶିଷ ମହାପାତ୍ରଙ୍କ ଅବାହକତ୍ୱରେ ଆୟୋଜିତ ଏହି ଯାତ୍ରାରେ ପ୍ରାନ୍ତପାଳ ପ୍ରଭୁଦତ୍ତ ସୁବୁଦ୍ଧି, ପ୍ରାକ୍ତନ ପ୍ରାନ୍ତପାଳ ଅଜୟ ଅଗ୍ରୱାଲ, ମହାସଚିବ ମନୋଜ ତ୍ରିପାଠୀ, ଉତ୍କଳ ସାମ୍ବାଦିକ ସଂଘ ରାଜ୍ୟ ସଭାପତି ବିଭୂତି ଭୂଷଣ କର, ରୟାଲ କ୍ଲବ ସଭାପତି ସଞ୍ଜିତ କୁମାର ଜେନା, କୋଷାଧ୍ୟକ୍ଷ ଅର୍ଜୁନ ସାହୁ ପ୍ରମୁଖ ଅଂଶଗ୍ରହଣ କରିଥିଲେ । ଆଗାମୀ ଦୁଇଦିନ ମଧ୍ୟରେ ସମଗ୍ର ରାଜ୍ୟରେ ରୋଟାରିୟାନମାନଙ୍କ ପକ୍ଷରୁ ଏଭଳି ଶୋଭାଯାତ୍ରାର ବ୍ୟାପକ ଆୟୋଜନ କରାଯାଇଛି ବୋଲି ପ୍ରାନ୍ତପାଳ ଶ୍ରୀ ସୁବୁଦ୍ଧି ସୂଚନା ଦେଇଛନ୍ତି ।
