ଗାନ୍ଧୀଜୀଙ୍କ ସମ୍ପର୍କିତ ପୁସ୍ତିକାରେ ଭୁଲ ତଥ୍ୟ ଅନିଚ୍ଛାକୃତ – ବିଦ୍ୟାଳୟ ଗଣ ଶିକ୍ଷା ମନ୍ତ୍ରୀ 

ଭୁୁବନେଶ୍ୱର, ୧୬ ନଭେମ୍ବର -ଗାନ୍ଧୀଜୀଙ୍କ ସମ୍ବନ୍ଧରେ  ଆମ ବାପୁଜୀ :  ଏକ ଝଲକ ନାମକ ପୁସ୍ତିକାରେ  ଦିଲ୍ଲୀର ବିରଲା ଭବନ ଠାରେ ଏକ ଆକସ୍ମିକ ଘଟଣା କ୍ରମେ ଗାନ୍ଧୀଜୀଙ୍କ  ଅକାଳ ବିୟୋଗ ଘଟିଥିଲା  ବୋଲି   ଯାହା   ପ୍ରକାଶ ପାଇଛି  ତାହା ଦ୍ୱାରା ଅନିଚ୍ଛାକୃତ  ତ୍ରଟି ବୋଲି  ରଖିବାକୁ ବିଦ୍ୟାଳୟ ଓ ଗଣ ଶିକ୍ଷା ମନ୍ତ୍ରୀ ସମୀର ରଂଜନ ଦାଶ ବିବୃତିରେ କହିଛନ୍ତି  ।

ପ୍ରଶ୍ନୋତର କାର୍ଯ୍ୟକ୍ରମ ଶେଷ ହେବା ମାତ୍ରେ ବାଚସ୍ପତି  ସୂର୍ଯ୍ୟ ନାରାୟଣ ପାତ୍ର  ବିଦ୍ୟାଳୟ ଓ ଗଣ ଶିକ୍ଷା ବିଭାଗର ପୁସ୍ତିକାରେ  ମହାତ୍ମା ଗାନ୍ଧୀଙ୍କ ସମ୍ପର୍କରେ ବିବାଦୀୟ ତଥ୍ୟ ପ୍ରକାଶିତ ହେବା ସମ୍ପର୍କରେ ଗୃହରେ ବିବୃତି ରଖିବାକୁ ବିଦ୍ୟାଳୟ ଓ ଗଣ ଶିକ୍ଷା ମନ୍ତ୍ରୀ ସମୀର ରଂଜନ ଦାଶଙ୍କୁ ଡାକିଥିଲେ ।

ଶ୍ରୀ ଦାଶ  କହିଥିଲେ ଯେ  ସରକାରଙ୍କର ପିଲା ମାନଙ୍କୁ କୌଣସି ଭୁଲ ତଥ୍ୟ ଦେବା କିମ୍ବା ବିଭ୍ରାନ୍ତ କରିବା କିମ୍ବା ଘଟଣା ଚକ୍ରକୁ ପରିବର୍ତନ କରିବାର କୌଣସି ଉଦେ୍ଧଶ୍ୟ ନ ଥିଲା  ।

ସେ କହିଥିଲେ ଯେ ଗୃହର ଉଦବେଗକୁ ସମ୍ମାନ ଜଣାଇ ଉକ୍ତ ପତ୍ରିକାକୁ ସରକାର  ପ୍ରତ୍ୟାହାର କରି ସାରିଛନ୍ତି । ଏହି ଘଟଣା ପାଇଁ ସଂପୃକ୍ତ କର୍ମଚାରୀଙ୍କୁ ସେବା ନିବୃତ କରିବା ସଙ୍ଗେ ସଙ୍ଗେ ଦୁଇ ଜଣ ଅଧିକାରୀଙ୍କୁ କୈଫିୟତ ତଲବ କରା ଯାଇଛି ।

ସେ କହିଛନ୍ତି ଯେ ପ୍ରତ୍ୟାହାର ହୋଇଥିବା ପତ୍ରିକାକୁ ଆବଶ୍ୟକୀୟ ସଂଶୋଧନ କରା ଯାଇ ପୁନଃ ମୁଦ୍ରଣ  ପତ୍ରିକା ଛାତ୍ର ଛାତ୍ରୀଙ୍କ ମଧ୍ୟରେ ଏକ ମାସ ମଧ୍ୟରେ ବଂଟା ଯିବ ।

 ମନ୍ତ୍ରୀଙ୍କ ବିବୃତି ପରେ ଶୂନ୍ୟକାଳରେ ବିଧାୟକ ନରସିଂହ ମିଶ୍ର କହିଥିଲେ ଯେ ମହାତ୍ମା ଗାନ୍ଧୀଙ୍କ ୧୫୦ ତମ ଜୟନ୍ତୀ ପାଳନ ପାଇଁ କମିଟିର ଅଧ୍ୟକ୍ଷ ହେଉଛନ୍ତି ନିଜେ ମୁଖ୍ୟମନ୍ତ୍ରୀ । ତାଙ୍କର ବିନା ଅନୁମତିରେ ଏପରି ଭୁଲ ତଥ୍ୟ ସମ୍ବଳିତ ପୁସ୍ତିକା ବିତରଣ କିପରି ହୋଇ ପାରିବ । ଏଥି ନିମନ୍ତେ ଦାୟୀ କିଏ ରହିବ ବୋଲି ସେ ପ୍ରଶ୍ନ କରିଥିଲେ ।

ବାଚସ୍ପତି ଶ୍ରୀ ପାତ୍ର କହିଥିଲେ ଯେ ମନ୍ତ୍ରୀଙ୍କର ବିବୃତି ପରେ ଏ ନେଇ ଆଲୋଚନା କରାଯିବା ବିଧିବ୍ୟବସ୍ଥାରେ ନାହିଁ । ତେଣୁ ତାଙ୍କର ଯଦି ଆଉ କୌଣସି ପ୍ରସଙ୍ଗ ଅଛି ତେବେ ତାକୁ ସେ ଉଠାଇ ପାରନ୍ତି ।  ଏହାର ଉତରରେ ଶ୍ରୀ ମିଶ୍ର କହିଥିଲେ ଯେ ସେ ମନ୍ତ୍ରୀଙ୍କ ବିବୃତି ଉପରେ ଆଲୋଚନା କରୁ ନାହାନ୍ତି ବରଂ ସେ କେବଳ ମନ୍ତ୍ରୀଙ୍କ ବିବୃତିକୁ ଉଦ୍ଧୃତ କରୁଛନ୍ତି । କିଛି ସମୟ ଧରି ଉଭୟଙ୍କ ମଧ୍ୟରେ ତର୍କ ବିତର୍କ ହୋଇଥିବାର ଦେଖିବାକୁ ମିଳିଥିଲା ।