ଭୁବନେଶ୍ୱର, ପୂର୍ବତନ ବିଧାୟକ, ହିନ୍ଦ ମଜଦୂର ସଭାର ପୂର୍ବତନ ରାଜ୍ୟ ସଭାପତି, ରାଜ୍ୟର ବିଭିନ୍ନ ଶ୍ରମିକ ସଂଗଠନର ନେତୃତ୍ୱ ନେଉଥିବା ବିଶିଷ୍ଟ ଶ୍ରମିକ ନେତା ସାଥୀ ରାଜେନ୍ଦ୍ର ପ୍ରସାଦ ସିଂଙ୍କର ଗତକାଲି ୭୬ ବର୍ଷ ବୟସରଙ୍କ ହୃଦଘାତରେ ବିୟୋଗ ଘଟିଛି ।ରାଜେନ୍ଦ୍ର ପ୍ରସାଦ ସିଂଙ୍କ ବିୟୋଗରେ ସିଆଇଟିୟୁ ରାଜ୍ୟ କମିଟି ପକ୍ଷରୁ ସଭାପତି ଜନାର୍ଦ୍ଦନ ପତି, ସାଧାରଣ ସମ୍ପାଦକ ବିଷ୍ଣୁ ମହାନ୍ତି ଶୋକ ପ୍ରକାଶ କରିବା ସହିତ ତାଙ୍କ ଶୋକସନ୍ତପ୍ତ ପରିବାର ବର୍ଗଙ୍କ ପ୍ରତି ଗଭୀର ସମବେଦନା ଜ୍ଞାପନ କରିଛନ୍ତି ।
ରାଜେନ୍ଦ୍ର ସିଂ ତାଙ୍କ ଛାତ୍ର ଅବସ୍ଥାରୁ ରାଜନୀତିକୁ ଆସି ରାଜ୍ୟର ଅବହେଳିତ ଶ୍ରମିକ ମାନଙ୍କର ଆନ୍ଦୋଳନର ନେତୃତ୍ୱ ନେଇଥିଲେ । କଟକ ମେହେନ୍ତର ସଂଘ, ରାଜ୍ୟ ମ୍ୟୁନିସପାଲଟି କର୍ମଚାରୀ ସଂଘ, ଅସଂଗଠିତ କ୍ଷେତ୍ରର ଶ୍ରମିକ ମାନଙ୍କ ସଂଗଠନର ସହିତ ଏକାଧିକ ଶ୍ରମିକ ସଂଗଠନର ନେତୃତ୍ୱ ନେଇ ନାର୍ଯ୍ୟ ଦାବି ଆଦାୟ ପାଇଁ ବହୁ ଆନ୍ଦୋଳନ ସଂଗଠିତ କରିଥିଲେ । ବିଶେଷକରି କେନ୍ଦ୍ରୀୟ ଟ୍ରେଡ ୟୁନିୟନ ମାନଙ୍କର ମିଳିତ ଆନ୍ଦୋଳନରେ ସକ୍ରୀୟ ଅଂଶ ଗ୍ରହଣ କରୁଥିଲେ ।
