ଗଞ୍ଜାମ, ଗଞ୍ଜାମ ଜିଲ୍ଲା ଉତର ଘୁମୁସର ବନଖଣ୍ଡ ଅନ୍ତର୍ଗତ ଜଗନ୍ନାଥପ୍ରସାଦ ରେଞ୍ଜ୍ ରେ ପୁଣି ଏକ ଦନ୍ତାହାତୀର ଗଳିତ ମୃତଦେହ ଠାବ କରାଯାଇଛି । ମୃତ ଦନ୍ତାହାତୀର ଗୋଟିଏ ଦାନ୍ତକୁ ଦୁର୍ବୃତ ମାନେ କାଟି ନେଇଥିବା ଦେଖିବାକୁ ମିଳିଛି । ଖବର ପାଇ ଜଙ୍ଗଲ ବିଭାଗ କର୍ମଚାରୀ ମାନେ ଘଟଣାସ୍ଥଳରେ ପହଂଚି ହାତୀର ଗଳିତ ମୃତଦେହକୁ ଜବତ କରିବା ସହ ଘଟଣାର ଅନୁଧ୍ୟାନ କରୁଛନ୍ତି । ହାତୀଟିର ବୟସ ପ୍ରାୟ ୪୦ ବର୍ଷ ଏବଂ ୪ ଦିନ ତଳୁ ତାର ମୃତ୍ୟୁ ଘଟିଥିବା ସୂଚନା ମିଳିଛି । ତେବେ ଆଜି ହାତୀଟିର ମୃତଦେହ ବ୍ୟବଚ୍ଛେଦ ପରେ ଘଟଣା ଅଧିକ ସ୍ପଷ୍ଟ ହେବ ଏବଂ କେଉଁ ପରିସ୍ଥିତିରେ ତାର ମୃତ୍ୟୁ ଘଟିଛି ତାହା ଜଣାପଡିବ ବୋଲି ଡିଏଫଓ ସୁଦର୍ଶନ ବେହେରା ସୂଚନା ଦେଇଛନ୍ତି । ହାତୀଟି ମୃତ ଅବସ୍ଥାରେ ଜଗନ୍ନାଥପ୍ରସାଦ ରେଞ୍ଜ ଅନ୍ତର୍ଗତ କନ୍ଧ ନୂଆପଲ୍ଲୀ ଜଙ୍ଗଲ ପାହାଡ଼ ନିକଟରେ ପଡିଥିବା ଦେଖିବାକୁ ପାଇ ସ୍ଥାନୀୟ ଲୋକେ ଏ ସମ୍ପର୍କରେ ବନ ବିଭାଗକୁ ସୂଚନା ଦେଇଥିଲେ ।
ପ୍ରକାଶ ଥାଉକି, ଗତ ୮ ତାରିଖରେ ଗଞ୍ଜାମ ଜିଲ୍ଲା ଉତର ଘୁମୁସର ବନଖଣ୍ଡ ଅନ୍ତର୍ଗତ ଜଙ୍ଗଲରୁ ଏକ ଗୁଳିବିଦ୍ଧ ଦନ୍ତାହାତୀର ଗଳିତ ମୃତଦେହ ଠାବ କରାଯାଇଥିଲା । ଏବେ ପୁଣି ଆଉ ଏକ ହାତୀର ମୃତଦେହ ଠାବ ହେବା ପରେ ହାତୀଙ୍କ ସୁରକ୍ଷା ନେଇ ଉଠିଛି ପ୍ରଶ୍ନ ।
