ଭୁୁବନେଶ୍ୱର, କଂଗ୍ରେସ ଦଳର ବିଧାୟକ ମୋହମ୍ମଦ ମୋକିମ କଂଗ୍ରେସ ସମର୍ଥିତ ପ୍ରାର୍ଥୀଙ୍କୁ ଭୋଟ ନ ଦେଇ ବିଜେପି ସମର୍ଥିତ ପ୍ରାର୍ଥୀଙ୍କୁ ଭୋଟ ଦେଇଥିବା ସମ୍ପର୍କରେ ସୂଚନା ମିଳିବା ପରେ ଏ ସମ୍ପର୍କରେ ହାଇକମାଣ୍ଡଙ୍କୁ ଅବଗତ କରା ଯିବ ବୋଲି ନିଜର ପ୍ରତିକ୍ରିୟାରେ କହିଛନ୍ତି ପ୍ରଦେଶ କଂଗ୍ରେସ କମିଟିର ସଭାପତି ଶରତ ପଟ୍ଟନାୟକ ।
ଏ ସମ୍ପର୍କରେ ସାମ୍ବାଦିକ ମାନଙ୍କୁ ପ୍ରତିକ୍ରିୟା ଦେଇ ସେ କହିଛନ୍ତି ଯେ ଏହି ଭୋଟରେ ଦଳୀୟ ହ୍ୱିପ ଲାଗୁ ହୋଇ ନ ଥାଏ । ହେଲେ କଂଗ୍ରେସ ଦଳର କେନ୍ଦ୍ରୀୟ ନେତୃତ୍ୱ ଯଶବନ୍ତ ସିହ୍ନାଙ୍କୁ ଭୋଟ ଦେବାକୁ ନିଷ୍ପତି ନେଇଥିଲା । ଏ ସମ୍ପର୍କରେ ଆଲୋଚନା ହେବା ପରେ କଂଗ୍ରେସ ବିଧାୟକ ମାନଙ୍କୁ ଅବଗତ କରା ଯାଇଥିଲା । ସମସ୍ତେ କେନ୍ଦ୍ରୀୟ ନେତୃତ୍ୱର ନିଷ୍ପତି ସହ ଅବଗତ ଥିଲେ । ହେଲେ ଜଣେ ବିଧାୟକ ନିଜେ ଗଣମାଧ୍ୟମରେ ସେ ଏନଡିଏ ପ୍ରାର୍ଥୀଙ୍କୁ ଭୋଟ ଦେବା କଥା କହିଛନ୍ତି । ତେଣୁ ଏ ସମ୍ପର୍କରେ ଦଳର ହାଇକମାଣ୍ଡଙ୍କୁ ଅବଗତ କରା ଯିବ । ଏହା ପରେ କୌଣସି ନିଷ୍ପତି କେନ୍ଦ୍ରୀୟ ହାଇକମାଣ୍ଡ ନେବେ ।
