ମାଲକାନଗିରି, ମାଛ ଧରିବାକୁ ଯାଇଥିବା ସମୟରେ ନଦୀରେ ବୁଡ଼ି ନିଖୋଜ ଥିବା ଜନୈକ ଯୁବକଙ୍କ ଶବ ଉଦ୍ଧାର ହୋଇଛି । ସୂଚନା ଅନୁଯାୟୀ, ମାଲକାନଗିରି ଜିଲ୍ଲା ଚିତ୍ରକୋଣ୍ଡା ବ୍ଲକ ସ୍ବାଭିମାନ ଅଞ୍ଚଳର ଧୂଳିପୁଟ ପଞ୍ଚାୟତ ଅନ୍ତର୍ଗତ ଆନିବିରଡି ଗ୍ରାମର ଭେଙ୍କଟ ଇସାଙ୍ଗ ( ୩୫ ) ଗତକାଲି ଅପରାହ୍ନରେ ମାଛ ଧରିବା ପାଇଁ ନିକଟସ୍ଥ ନଦୀକୁ ଯାଇଥିଲା । ମାଛ ଧରିବାବେଳେ ଅସାବଧାନତା ଯୋଗୁ ସେ ନଦୀରେ ଭାସି ନିଖୋଜ ହୋଇଯାଇଥିଲେ। ଅନ୍ୟପଟେ ବହୁ ସମୟ ପରେ ମଧ୍ୟ ଭେଙ୍କଟ ଘରକୁ ଫେରିବାରୁ ପରିବାର ଲୋକ ବ୍ୟସ୍ତ ବିବ୍ରତ ହୋଇ ଖୋଜାଖୋଜି କରିଥିଲେ ହେଁ ତାଙ୍କୁ ପାଇ ନଥିଲେ । ଭେଙ୍କଟ ନଦୀରେ ଭାସି ଯାଇଥିବା ସନ୍ଦେହ କରି ଆଜି ପରିବାର ଲୋକ ଚିତ୍ରକୋଣ୍ଡା ଅଗ୍ନିଶମ ବିଭାଗକୁ ଖବର ଦେଇଥିଲେ । ପରେ ଅଗ୍ନିଶମ କର୍ମଚାରୀ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ । ବହୁ ସମୟ ଧରି ଖୋଜାଖୋଜି କରିବା ପରେ ନଦୀରୁ ଭେଙ୍କଟଙ୍କ ଶବ ଉଦ୍ଧାର କରିଥିଲେ। ଆଜି ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯିବ ବୋଲି ପୁଲିସ ସୂଚନା ଦେଇଛି ।
