ବଲାଙ୍ଗିର, ନିଜ ମଦ୍ୟପ ସ୍ଵାମୀକୁ ଲୁହା ରଡ୍ ରେ ପିଟି ଗୁରୁତର ଆହାତ କରିଥିବା ଓ ସ୍ଵାମୀ ଜଣକ ଲହୁଲୁହାଣ ହୋଇ ବର୍ତ୍ତମାନ ବୁର୍ଲା ହସ୍ପିଟାଲକୁ ସ୍ଥାନାନ୍ତରଣ ହୋଇଥିବା ପରି ଏକ ଅଭାବନୀୟ ଘଟଣା ଘଟିଛି। ସୂଚନାରୁ ପ୍ରକାଶ ଯେ, ବଲାଙ୍ଗିର ଜିଲା ତୁରେକେଲା ବ୍ଲକ ଅନ୍ତର୍ଗତ ବ୍ରଡ ଟେକଲା ଗାଁ ର ଲିଙ୍ଗରାଜ ମାଝୀ ପ୍ରତିଦିନ ମଦ ପିଇ ଆସି ନିଜର ସ୍ତ୍ରୀ ସହ ଝଗଡା କରିଥାଏ। ସବୁଦିନ ପରି ଗତକାଲି ସନ୍ଧ୍ୟାରେ ଲିଙ୍ଗରାଜ ଘରକୁ ଆସି ନିଜ ସ୍ତ୍ରୀ ଲଳିତାକୁ ମଦ ପିଇବା ପାଇଁ ଟଙ୍କା ମାଗିଥିଲା। ଟଙ୍କା ଦେବାକୁ ସ୍ତ୍ରୀ ମନା କରିବାରୁ ଦୁଇ ଜଣଙ୍କ ମଧ୍ୟରେ ବଚସା ହୋଇଥିଲା। ଏପରିକି ଲିଙ୍ଗରାଜ ନିଜ ସ୍ତ୍ରୀ ଲଳିତାକୁ ନିଶାଗ୍ରସ୍ତ ଅବସ୍ଥାରେ ମାରପିଟ୍ ମଧ୍ୟ କରିଥିଲା। ଶେଷରେ ଉତ୍ୟକ୍ତ ହୋଇ ଘରେ ଥିବା ଏକ ଲୁହା ରଡ଼ରେ ଲଳିତା ଲିଙ୍ଗରାଜକୁ ଆକ୍ରମଣ କରିଥିଲେ। ଏଥିରେ ଲିଙ୍ଗରାଜର ମୁଣ୍ଡରେ ଗଭୀର ଆଘାତ ଲାଗିଛି। ଗୁରୁତର ଅବସ୍ଥାରେ ଲିଙ୍ଗରାଜକୁ ପ୍ରଥମେ ବଲାଙ୍ଗିର ହସ୍ପିଟାଲ ଓ ଆଜି ଅଧିକ ଚିକିତ୍ସା ନିମନ୍ତେ ବୁର୍ଲା ମେଡିକାଲ କଲେଜ ଓ ହସ୍ପିଟାଲକୁ ସ୍ଥାନାନ୍ତରଣ କରାଯାଇଛି।
