ବଲାଙ୍ଗିର, ପ୍ରଧାନ ଶିକ୍ଷୟତ୍ରୀଙ୍କ ବଦଳି ବାତିଲ ଦାବୀରେ ସ୍କୁଲରେ ତାଲା ପକାଇଲେ ଛାତ୍ରଛାତ୍ରୀ । ଏପରି ଘଟଣା ଘଟିଛି ବଲାଙ୍ଗିର ସହର ଭିତରେ । ଗାନ୍ଧିନଗର ପଡାର ପ୍ରାକ୍ଟିସିଂ ସ୍କୁଲର ପ୍ରଧାନ ଶିକ୍ଷୟତ୍ରୀ ଅନିତା ସାଏଙ୍କୁ ବଦଳି କରାଯାଇଛି । ଏହା ଜାଣିବା ପରେ ଛାତ୍ରଛାତ୍ରୀ ଓ ଅଭିଭାବକ ମାନେ ସ୍କୁଲରେ ତାଲା ପକାଇ ଆନ୍ଦୋଳନ କରୁଛନ୍ତି । ପ୍ରଧାନ ଶିକ୍ଷୟତ୍ରୀ ଅନିତା ସାଏ, ଭଲ ପାଠ ପଢାଉ ଥିବା ବେଳେ ଛାତ୍ରଛାତ୍ରୀଙ୍କ ସହିତ ଉତ୍ତମ ବ୍ୟବହାର କରୁଥିଲେ । ତେଣୁ ତାଙ୍କ ବଦଳିକୁ ସହଜରେ ଗ୍ରହଣ କରି ପାରୁନାହନ୍ତି ଛାତ୍ରଛାତ୍ରୀ ଓ ଅଭିଭାବକ । ଶୀଘ୍ର ଅନିତା ଦିଦିଙ୍କ ବଦଳି ବାତିଲ କରିବା ଦାବୀରେ ସ୍କୁଲରେ ତାଲା ପକାଇ ଅନ୍ଦୋଳନ କରୁଛନ୍ତି ଛାତ୍ରଛାତ୍ରୀ ।
ଗତ କିଛି ଦିନ ଆଗରୁ ଏହି ସ୍କୁଲର ମଧ୍ୟାହ୍ନ ଭୋଜନରେ ପଚା ଅଣ୍ଡା ଦିଆଯାଇଥିବା ଘଟଣାକୁ ନେଇ ତୁମ୍ବିତୋଫାନ ହୋଇଥିଲା । ଏସ.ଏଚ.ଜି ଗ୍ରୁପ ପଚା ଅଣ୍ଡା ଦେଉଥିବା ଅଭିଯୋଗ ଆଣିଥିଲେ ଅନିତା ଦିଦି । ଶିକ୍ଷା ଵିଭାଗ ଏସ.ଏଚ.ଜି ଗ୍ରୁପ ବିରୋଧରେ କାର୍ଯ୍ୟାନୁଷ୍ଠାନ ନେବା ବଦଳରେ ଓଲଟା ପ୍ରଧାନ ଶିକ୍ଷୟତ୍ରୀଙ୍କୁ ବଦଳି କରିଥିବା ନେଇ ଚର୍ଚ୍ଚା ଜୋର ଧରିଛି ।
