ବଲାଙ୍ଗିର, ବଲାଙ୍ଗିର ସଦର ଥାନାକୁ ଆଜି ସକାଳେ ଖବର ସଂଗ୍ରହ ପାଇଁ ଯାଇଥିବା ସାମ୍ବାଦିକ ବିଶ୍ଵଜିତ୍ ଦାଶଙ୍କୁ ଥାନା ଭିତରେ ଜଣେ ଅତିରିକ୍ତ ସବ୍ ଇନ୍ସପେକ୍ଟର ଠେଲା ପେଲା କରିବା ସହିତ ଅସମ୍ମାନ ପ୍ରଦର୍ଶନ କରିଥିବା ଅଭିଯୋଗ ହୋଇଛି । ଏହି ଘଟଣା ସଂପର୍କରେ ପୋଲିସ ଜିଲ୍ଲା ଅଧିକାରି ନୀତିନ କୁଶଳକର ଓ ଜିଲ୍ଲା ସାମ୍ବାଦିକ ସଂଘର ଦୃଷ୍ଟିକୁ ଆଣିବା ପରେ ସଂଘର ସଭାପତି ସମ୍ପାଦକ ଓ ଆରକ୍ଷୀ ଅଧିକ୍ଷକ ଥାନାରେ ପହଞ୍ଚିଥିଲେ । ସେଠାରେ ଥାନାରେ ଥିବା ସି ସି ଟିଭି ଫୁଟେଜ ଦେଖିବା ପରେ ଆରକ୍ଷୀ ଅଧିକ୍ଷକ ସମ୍ପୃକ୍ତ ସାମ୍ବାଦିକ ଓ ସଂଘ କାର୍ଯ୍ୟକର୍ତ୍ତାଙ୍କୁ କାର୍ଯ୍ୟାନୁଷ୍ଠାନ ପ୍ରତିଶ୍ରୁତି ଦେଇଥିଲେ ।
ବଲାଙ୍ଗିର ତହସିଲରେ ଜମି କେଳେଙ୍କରି ଅଭିଯୋଗ ପାଇ ଆଜି ସକାଳେ ସାମ୍ବାଦିକ ଜଣକ ଥାନା ଅଧିକାରିଙ୍କ ଠାରୁ ଅନୁମତି ନେଇ ଯାଇଥିବା ବେଳେ ଏହି ଘଟଣା ଘଟିଥିବା ଶ୍ରୀ ଦାଶ କହିଛନ୍ତି । ସାମ୍ବାଦିକ ମାନଙ୍କୁ ଯେପରି ଏଭଳି ଆକ୍ରମଣର ଶିକାର ହେବାକୁ ନ ପଡେ ସେଥିପ୍ରତି ଦୃଷ୍ଟିଦେବେ ବୋଲି ଆରକ୍ଷୀ ଅଧିକ୍ଷକ କହିଛନ୍ତି । ଏହି ଘଟଣାକୁ ନେଇ ଜିଲ୍ଲାରେ ସାମ୍ବାଦିକ ମାନଙ୍କ ଭିତରେ ପ୍ରତିକ୍ରିୟା ପ୍ରକାଶ ପାଇଥିବା ବେଳେ ଆରକ୍ଷୀ ଅଧିକ୍ଷକଙ୍କ ସମୟୋଚିତ ପଦକ୍ଷେପକୁ ସ୍ବାଗତ କରାଯାଇଛି ।
