ଭୁବନେଶ୍ୱର , ସାମ୍ବାଦିକ ସୁରକ୍ଷା ପାଇଁ ସ୍ୱତନ୍ତ୍ର ଆଇନ୍ ପ୍ରଣୟନ କରିବା, ବୀମା ରାଶି ୨ଲକ୍ଷରୁ ୫ଲକ୍ଷକୁ ବୃଦ୍ଧି କରିବା, ସ୍ୱାସ୍ଥ୍ୟ ବୀମାରେ ସାମ୍ବାଦିକଙ୍କ ବାପା ଓ ମା’ଙ୍କୁ ଅନ୍ତର୍ଭୁକ୍ତ କରିବା କିମ୍ବା ସାମ୍ବାଦିକଙ୍କ ବାପା’ଓ ମା’ଙ୍କୁ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାରେ ସାମିଲ କରିବା ଓ ଦୁର୍ଘଟଣାରେ ମୃତ ସାମ୍ବାଦିକ ଅଶୋକ ପଣ୍ଡା ପରିବାରଙ୍କୁ ଯଥା ଶିଘ୍ର ସହାୟତା ପ୍ରଦାନ କରିବାକୁ ଦାବି କରିଛି ସାମ୍ବାଦିକ ମିଳିତ ମଂଚ । ମଂଚ ପକ୍ଷରୁ ଏନେଇ ସୂଚନା ଓ ଲୋକ ସମ୍ପର୍କ ବିଭାଗ ମନ୍ତ୍ରୀ ପ୍ରଦୀପ କୁମାର ଅମାତଙ୍କୁ ଭେଟି ଆଲୋଚନା କରାଯିବା ସହ ଏକ ଦାବିପତ୍ର ପ୍ରଦାନ କରାଯାଇଛି । ମନ୍ତ୍ରୀ ଆଲୋଚନା ବେଳେ ଏନେଇ ପଦକ୍ଷେପ ନେବେ ଓ ସ୍ୱର୍ଗତ ପଣ୍ଡାଙ୍କ ପରିବାରଙ୍କୁ ସରକାରୀ ସହାୟତା ଯେପରି ଶିଘ୍ର ମିଳିବ ଏନେଇ ପ୍ରତିଶୃତି ଦେଇଥିଲେ । ଓଡ଼ିଶା ବିଧାନ ସଭାରେ ସ୍ୱତନ୍ତ୍ର ଆଇନ୍ ପ୍ରଣୟନ ପାଇଁ ମଂଚ ପକ୍ଷରୁ ରାଜ୍ୟର ୫ଜଣ ମନ୍ତ୍ରୀ ଓ ୫୦ଜଣ ବିଧାୟକ ଓ ବହୁ ବିଶିଷ୍ଟ ବ୍ୟକ୍ତିଙ୍କୁ ଭେଟି ନିବେଦନ କରାଯାଇଛି । ମହାରାଷ୍ଟ୍ର ପରି ସାମ୍ବାଦିକ ସୁରକ୍ଷା ଆଇନ ଲାଗୁ କରିବା ପାଇଁ ଓଡ଼ିଶାରେ ଏହି ଅଭିଯାନ ଆରମ୍ଭ ହୋଇଥିବା ବେଳେ ବିଭିନ୍ନ ରାଜ୍ୟରେ ଅଭିଯାନ କରାଯିବ ବୋଲି ସାମ୍ବାଦିକ ମିଳିତ ମଂଚର ଆବାହକ ଡ. ଲିଙ୍ଗରାଜ ସାହୁ କହିଛନ୍ତି । ଏହି ଦାବି ପତ୍ର ପ୍ରଦାନ ବେଳେ ସାମ୍ବାଦିକ ସାରଦା ପ୍ରସନ୍ନ ଶତପଥି, ମନୋରଞ୍ଜନ ମିଶ୍ର, ବିଦ୍ୟାଧର ବାରକ୍, ବିମଳ ପ୍ରଧାନ, ରାଜେଶ ସାମଲ, ବିଭୂତି ସାହୁ, ସଞ୍ଜୟ ପରିଡ଼ା ଓ ବହୁ ସାମ୍ବାଦିକ ସାମିଲ ହୋଇଥିଲେ ।
