କଟକ/ସାଲେପୁର, କଟକ ଜିଲ୍ଲା କିଶୋର ନଗର ଥାନା ସମ୍ମୁଖରେ ଆଜି ସକାଳେ ଜଣେ ବ୍ୟକ୍ତି ନିଜ ଦେହରେ ପେଟ୍ରୋଲ ଢାଳି ନିଆଁ ଲଗାଇ ଆତ୍ମହୂତି ଉଦ୍ୟମ କରିଛନ୍ତି । ସ୍ଥାନୀୟ ଲୋକେ ତାଙ୍କୁ ସେଠାରୁ ଗୁରୁତର ଅବସ୍ଥାରେ ଉଦ୍ଧାର କରି ପ୍ରଥମେ କିଶୋର ନଗର ମେଡିକାଲରେ ଭର୍ତି କରିଥିଲେ । ପରେ ଅବସ୍ଥା ସଙ୍କଟାପନ୍ନ ହୋଇପଡିବାରୁ ତାଙ୍କୁ କଟକ ବଡ ମେଡିକାଲକୁ ସ୍ଥାନାନ୍ତରିତ କରାଯାଇଛି । ତାଙ୍କ ସ୍ଵାସ୍ଥ୍ୟାବସ୍ଥା ଉଦବେଗଜନକ ରହିଛି । ଗୁରୁତର ବ୍ୟକ୍ତିଙ୍କ ନାମ ଗୁଣନିଧି ବିଶୋୟୀ । ୫୦ ବର୍ଷିୟ ଏହି ବ୍ୟକ୍ତି ଜଣକ ଜମିବାଡ଼ି ଓ ପାରିବାରିକ ବିବାଦକୁ କେନ୍ଦ୍ର କରି ଏପରି ଚରମ ପଦକ୍ଷେପ ନେଇଥିବା ଜଣାପଡିଛି ।
ପ୍ରକାଶ ଥାଉକି, ଜମିବାଡ଼ି ବିବାଦ ସଂକ୍ରାନ୍ତରେ ସେ ଗତ ୮ ଦିନ ତଳେ କିଶୋର ନଗର ଥାନାରେ ଏକ ଏତଲା କରିଥିଲେ । ତେବେ ପୋଲିସ ତାଙ୍କ ଏତଲାକୁ କୌଣସି ଗୁରୁତ୍ଵ ନଦେବାରୁ ଶେଷରେ ହତାଶ ହୋଇ ସେ ଏଭଳି ନିଷ୍ପତି ନେଇଥିବା କୁହାଯାଉଛି ।
ଅନ୍ୟପକ୍ଷରେ ଏ ସମ୍ପର୍କରେ ସମ୍ପୃକ୍ତ ଥାନା ଅଧିକାରୀଙ୍କ ପ୍ରତିକ୍ରିୟା ନେବାକୁ ଚେଷ୍ଟା କରାଯାଇଥିଲେ ସୁଦ୍ଧା ସେ ଫୋନ୍ ଉଠାଇନଥିଲେ ।
