ପୁରୀ, ପୁରୀ ରଥଖଳା ନିକଟରେ ଆଜି ସକାଳେ ଏକ ପିକଅପ୍ ଭ୍ୟାନ୍ ଦୁର୍ଘଟଣାଗ୍ରସ୍ତ ହୋଇଛି । ଫଳରେ ଜଣେ ମହିଳାଙ୍କ ସମେତ ଦୁଇ ଜଣ ପର୍ଯ୍ୟଟକ ଆହତ ହୋଇଛନ୍ତି । ସେମାନଙ୍କୁ ଚିକିତ୍ସା ନିମନ୍ତେ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତି କରାଯାଇଛି । ଆହତ ଦୁଇ ପର୍ଯ୍ୟଟକ ହେଲେ ଅନୁଗୁଳ ଲୁହାବିନ୍ଧାର ଗିରୀଶ ସାହୁ ଓ ବୈଜୟନ୍ତୀ ସାହୁ । ସେମାନେ ନିଜର ୮ରୁ ୧୦ ଜଣ ସମ୍ପର୍କିୟଙ୍କ ସହିତ ପୁରୀ ବୁଲିବାକୁ ଆସିଥିବା ବେଳେ ଏହି ଦୁର୍ଘଟଣା ଘଟିଛି । ଆହତ ଦ୍ଵୟଙ୍କୁ ମେଡିକାଲରେ ଭର୍ତି କରିବା ସହ ଡ୍ରାଇଭରକୁ ଥାନାରେ ଅଟକ ରଖି ପଚରା ଉଚୁରା ଚଳାଇଛି ପୋଲିସ । ସେମାନେ ବ୍ୟାରିକେଡ୍ ଭିତରେ ଥିବା ବେଳେ ପିକଅପ୍ ଭ୍ୟାନ୍ ଟି ବ୍ୟାରିକେଡ୍ ଭାଙ୍ଗି ଧକ୍କା ଦେଇଥିବା ଅଭିଯୋଗ କରିଛନ୍ତି ଆହତଙ୍କ ସମ୍ପର୍କିୟ ।
ଅନ୍ୟପକ୍ଷରେ ପିକଅପ୍ ଭ୍ୟାନ୍ ଡ୍ରାଇଭରଙ୍କୁ ହଠାତ୍ ବାତ ମାରିବାରୁ ଏପରି ଘଟିଥିବା ସୂଚନା ମିଳିଛି ।
