ଧର୍ମଶାଳା, ଯାଜପୁର ଜିଲା ଧର୍ମଶାଳା ତହସିଲ ଅନ୍ତର୍ଗତ ମର୍ଜିତାପୁର ସ୍ଥିତ ବ୍ରାହ୍ମଣୀ ନଦୀରେ ବେଆଇନ ବାଲି ଉତୋଳନ ନେଇ ସ୍ପେଶାଲ ସ୍କ୍ବାର୍ଡ ଓ ଧର୍ମଶାଳା ତହସିଲ ପକ୍ଷରୁ ଆଜି ସକାଳେ ଚଢଉ କରାଯାଇଥିଲା । ଏହି ଚଢଉ ସମୟରେ ଗୋଟିଏ ପ୍ରୋକଲିନ ମେସିନ,୮ ଗୋଟି ହାଇୱା ଓ ୨ଟି ଟ୍ରାକ୍ଟର ଜବତ ହୋଇଛି । ଗାଡି ଗୁଡିକର କାଗଜପତ୍ର ଯାଂଚ କରାଯିବା ସହିତ ସେମାନଙ୍କ ଠାରୁ ଜରିମାନା ଆଦାୟ କରାଯିବ ବୋଲି ଜଣାପଡିଛି । ଏହି ଚଢଉ ଫଳରେ ସ୍ଥାନୀୟ ଅଂଚଳରେ ବାଲି ମାଫିଆ ମହଲରେ କୋକୁଆ ଭୟ ସୃଷ୍ଟି ହୋଇଛି ।
ସୂଚନା ମୁତାବକ, ଏହି ତହସିଲ ଅନ୍ତର୍ଗତ ମର୍ଜିତାପୁର ଠାରେ ସରକାରଙ୍କ ପକ୍ଷରୁ ବାଲି ଘାଟ ଲିଜ ଦିଆଯାଇଛି । ତେବେ ଏଠାରୁ କିଛି ମାଫିଆ ବାଲି ଉତୋଳନ ନକରି ଅନ୍ୟତ୍ର ନଦୀରୁ ବେଆଇନଭାବେ ବାଲି ଉତୋଳନ କରୁଥିଲେ। ଯାହାକୁ ନେଇ ପ୍ରଶାସନ ନିକଟରେ ବାରମ୍ବାର ଅଭିଯୋଗ ହୋଇଥିଲା । ଫଳରେ ଆଜି ସକାଳେ ସ୍ପେଶାଲ ସ୍କ୍ବାର୍ଡ ଓ ତହସିଲ ପକ୍ଷରୁ ଏହି ଚଢଉ କରାଯାଇଥିଲା।
