-
ଦୁଇ ଦିନ ପରେ ବି ପୋଲିସ ହାତ ଖାଲି
ମୁଖୀଗୁଡା, କଳାହାଣ୍ଡି ଜିଲ୍ଲା ମୁଖୀଗୁଡା ଜଗନ୍ନାଥ ମନ୍ଦିରରୁ ଚୋରି ଘଟଣାର ଦୁଇ ଦିନ ପରେ ବି ପୋଲିସ ଚୋରି ସାମଗ୍ରୀ ଉଦ୍ଧାର କରିବା କିମ୍ବା ଚୋରଙ୍କୁ ଧରିବାରେ ସଫଳ ହୋଇପାରିନାହିଁ । ଅନ୍ୟପକ୍ଷରେ ରଥଯାତ୍ରା ପୂର୍ବରୁ ଜଗନ୍ନାଥ ମନ୍ଦିରରୁ ଚୋରି ଘଟଣା ଭକ୍ତଙ୍କ ଭାବାବେଗକୁ ଆଘାତ ଦେଇଛି ।
ଗତ ୩ ତାରିଖ ବିଳମ୍ବିତ ରାତିରେ କଳାହାଣ୍ଡି ଜିଲ୍ଲା ମୁଖୀଗୁଡା ଜଗନ୍ନାଥ ମନ୍ଦିରରୁ ଲକ୍ଷାଧିକ ଟଙ୍କାର ରୁପା ଅଳଙ୍କାର, ପିତଳ ସାମଗ୍ରୀ, ହୁଣ୍ଡିରେ ଥିବା ଟଙ୍କା ଚୋରି ହୋଇଥିବା ନେଇ ମନ୍ଦିର ପରିଚାଳନା କମିଟି ପକ୍ଷରୁ ମୁଖୀଗୁଡା ଫାଣ୍ଡିରେ ଏତଲା ହୋଇଥିଲା । ପୋଲିସ ଏ ସଂକ୍ରାନ୍ତରେ ଏକ ମାମଲା ରୁଜ୍ଜୁ କରି ତଦନ୍ତ ଜାରୀ ରଖିଛି । ଗତକାଲି ପୋଲିସ ଘଟଣାସ୍ଥଳରେ ପହଂଚି ସାଇଂଟିଫିକ୍ ଟିମ୍ ଓ ସନ୍ଧାନୀ କୁକୁର ସାହାଯ୍ୟରେ ଛାନଭିନ୍ କରିଥିଲା । ହେଲେ ଏ ପର୍ଯ୍ୟନ୍ତ ପୋଲିସ ହାତ ଖାଲି । ପୋଲିସ ଠାକୁରଙ୍କ ରୂପା ଅଳଙ୍କାର ଓ ହୁଣ୍ଡି ଟଙ୍କା ଉଦ୍ଧାର କରିବାରେ ସଫଳ ହୋଇନାହିଁ । ଚୋରଙ୍କର ମଧ୍ୟ କୌଣସି ସୁରାଗ୍ ପାଇନି ପୋଲିସ । ତେଣୁ ଏ ଦିଗରେ ତଦନ୍ତକୁ ଜୋରଦାର କରିବା ସହ ତୁରନ୍ତ ଚୋରି ସାମଗ୍ରୀ ଉଦ୍ଧାର କରିବା ଏବଂ ଚୋରଙ୍କୁ ପୋଲିସ ଗିରଫ କରୁ ବୋଲି ସାଧାରଣରେ ଦାବି ହେଉଛି ।
