-
୩ ଜୁଆଡି ଗିରଫ, ନଗଦ ୩ ଲକ୍ଷ ୮୮ ହଜାର ଟଙ୍କା ଜବତ
ଗଞ୍ଜାମ, ଗଞ୍ଜାମ ଜିଲ୍ଲା କେ. ନୂଆଗାଁ ପୋଲିସ ଗତକାଲି ସଂନ୍ଧ୍ୟାରେ ଏକ ବଡ଼ ଧରଣର ଜୁଆ ଆଡ୍ଡା ଉପରେ ଚଢଉ କରି ଜୁଆଡିଙ୍କୁ ଧରିବାରେ ସଫଳତା ପାଇପାରିଛି । ଚିକିଟି ବ୍ଳକ କୋଟିଲିଙ୍ଗି ପଚାଂୟତ ମେଟାଗାଁ ଗ୍ରାମ ନିକଟସ୍ଥ ପର୍ବତ ପାର୍ଶ୍ୱରେ ଜୁଆ ଖେଳ ଚାଲିଥିବା ନେଇ ପୋଲିସ ବିଶେଷ ସୂତ୍ରରୁ ଖବରପାଇ ଅତର୍କିତ ଭାବେ ସେଠାରେ ଚଢଉ କରିଥିଲା । ପୋଲିସ ୩ ଜୁଆଡିଙ୍କୁ ଗିରଫ କରିବା ସହ ନଗଦ ୩ ଲକ୍ଷ ୮୮ ହଜାର ଟଙ୍କା ସମେତ ଦୁଇଟି ବାଇକ୍ ଓ ମୁଠା ତାସ ଜବତ କରିଥିଲା । ଗିରଫ ଯୁବକ ମାନଙ୍କ ମଧ୍ୟରେ ଶ୍ରୀକାକୁଲମ ଜିଲ୍ଲା ଇଚ୍ଛାପୁର ଟାଉନର ଜି . ଜଗାମାଥମ , ନୂଆଗାଁ ଥାନା ଅଧିନସ୍ଥ କୋଟିଲିଙ୍ଗି ଗ୍ରାମର ନାରଦ ଧର୍ମାରାଜୁ ଓ ବଡପଲଙ୍କ ଗ୍ରାମର ଆର୍ . ପ୍ରଶାନ୍ତ ରେଡ୍ଡୀ ବୋଲି ଜଣାପଡିଛି । ଖବରନୁଯାୟୀ, ଦୀର୍ଘଦିନ ଧରି ଏହି ପାହାଡ ପାର୍ଶ୍ୱକୁ ଓଡ଼ିଶା ସମେତ ଆନ୍ଧ୍ରପ୍ରଦେଶର ବିଭିନ୍ନ ଜିଲ୍ଲାର ଅସାମାଜିକ ଧରଣର ଯୁବକମାନେ ପୋଲିସକୁ ଚକମା ଦେଇ ବେଆଇନ ଭାବେ ଜୁଆଖେଳ ଖେଳୁଥିଲେ । ଏପରିକି ପୋଲିସ ଖବର ବାରମ୍ବାର ସେଠାକୁ ଯାଉଥିଲେ ମଧ୍ୟ ସେମାନଙ୍କୁ ଧରିବାରେ ବିଫଳ ହେଉଥିଲା ।
ତେବେ ଗୁରୁବାର ଅପରାହ୍ନରେ ସ୍ଥାନୀୟ ପୋଲିସ ଖବରପାଇ ଥାନା ଅଧିକାରୀ ମୃତ୍ୟୁଞ୍ଜୟ ସ୍ଵାଇଁଙ୍କ ନେତୃତ୍ଵରେ ପୋଲିସ ଟିମ ଉକ୍ତ ସ୍ଥାନରେ ଚଢଉ କରିଥିଲେ । ପୋଲିସର ଏହି ଚଢ଼ଉରେ ଜୁଆଡି ଛତ୍ରଭଙ୍ଗ ଦେଇଥିଲେ ମଧ୍ୟ ପୋଲିସ ୩ ଜଣକୁ କାବୁ କରିଥିଲା । ଘଟଣାସ୍ଥଳରୁ ବିପୁଳ ପରିମାଣର ଟଙ୍କା ସମେତ ଖେଳ ନିମନ୍ତେ ବ୍ୟବହୃତ ତାସ ଓ ବାଇକ୍ ଜବତ କରିଥିଲା । ଏନେଇ ନୂଆଗାଁ ଥାନା ମାମଲା ନଂ ୧୩୨/୨୨ ଅନୁସାରେ ସମସ୍ତ ଅଭିଯୁକ୍ତଙ୍କ ବିରୋଧରେ ମାମଲା ରୁଜୁ କରାଯାଇ ଶୁକ୍ରବାର ଦିନ କୋର୍ଟ ଚାଲାଣ କରାଯାଇଥିବା ଥାନା ଅଧିକାରୀ ଶ୍ରୀ ସ୍ୱାଇଁ ସୂଚନା ଦେଇଛନ୍ତି ।
