କନ୍ଧମାଳ, କନ୍ଧମାଳ ଜିଲ୍ଲାର ବାଲିଗୁଡ଼ା ଠାରେ ମୁତୟନ ଥିବା ସିଆରପିଏଫ ୧୨୭ ବାଟାଲିୟନର ଯବାନ ମାନେ ଆଜି ସକାଳେ କୁମ୍ବିଂ ଅପରେସନ ବେଳେ ବେଲଘର ଥାନା ଅନ୍ତର୍ଗତ ଲଙ୍କାଗଡ଼ ଗ୍ରାମପଚାଂୟତର ଗାହାଲି ଗାଁ ନିକଟ ଜଙ୍ଗଲରୁ ମାଟି ତଳୁ ଏକ ଟିଫିନ୍ ବୋମା ଉଦ୍ଧାର କରିଛନ୍ତି । ଗାହାଲି ଗ୍ରାମ ଠାରୁ ୮୦୦ ମିଟର ଦୂରରୁ ଏହି ଟିଫିନ୍ ବୋମା ଉଦ୍ଧାର କରାଯାଇଛି ।
ସୂଚନା ଅନୁସାରେ, ଗାହାଲି ଗ୍ରାମ ନିକଟରେ ଜଣେ ଅଜ୍ଞାତ ବ୍ୟକ୍ତି ବ୍ୟାଗ୍ ରେ କିଛି ଜିନିଷ ନେଇ ଯାଉଥିବା ସମ୍ପର୍କରେ ବିଶ୍ଵସ୍ତ ସୂତ୍ରରୁ ସୂଚନା ପାଇ ସିଆରପିଏଫ ପକ୍ଷରୁ ସମ୍ପୃକ୍ତ ଅଂଚଳରେ କୁମ୍ବିଂ ଅପରେସନ କରାଯାଇଥିଲା । ସିଆରପିଏଫ କମାଣ୍ଡାଂଟ ଆନନ୍ଦ ଝା, ଓ ଆସିଷ୍ଟାଂଟ କମାଣ୍ଡାଂଟ କୁମାର ରାଘବେନ୍ଦ୍ରଙ୍କ ନେତୃତ୍ଵରେ ଏକ ସ୍ଵତନ୍ତ୍ର ଟିମ୍ ଗଠନ କରାଯାଇ ଏହି କୁମ୍ବିଂ ଅଭିଯାନ ଆରମ୍ଭ କରାଯାଇଥିଲା । ତେବେ ଏହି ଟିଫିନ୍ ବୋମା ଉଦ୍ଧାର ପରେ ଏହାକୁ ନିଷ୍କ୍ରିୟ କରାଯାଇଥିବା ନେଇ କମାଣ୍ଡାଂଟ ଆନନ୍ଦ ଝା ସୂଚନା ଦେଇଛନ୍ତି । ଏଥି ସହିତ ସେହି ଅଂଚଳରେ ମାଓବାଦୀ ମାନଙ୍କର ଚଳପ୍ରଚଳ ଥିବା ସେ କହିଛନ୍ତି ।
