ନୂଆପଡା – ନୂଆପଡା ଜିଲ୍ଲା ଖଡିଆଳ ପୁଲିସ ଗତରାତ୍ରରେ ଏକ ବାଇକ ଚୋରଙ୍କୁ ଗିରଫ କରିବା ସହ ତାଙ୍କ ଠାରୁ ଚୋରୀ ହୋଇଥିବା ୨ ବାଇକ ଉଦ୍ଧାର କରିଛି । ସୂଚନାମତେ ଖଡିଆଳ ବ୍ଲକ ଚନାବେଡା ପଞ୍ଚାୟତର ବରପଦର ଗ୍ରାମର ଗିରିଶ କୁମାର ନାଏକ ନାମକ ଚୋର ଗତ ସେପ୍ଟେମ୍ବର ମାସରେ ୨ ଗୋଟି ବାଇକକୁ ଚୋରୀ କରିଥିଲେ । ସେ ଗତ ୨/୯/୨୦୧୯ ଦିନ ଖଡିଆଳ ସହରର ଦୁରୀଆପଡାର କୁମାର ସାଗର ନାମକ ବ୍ୟକ୍ତି ନିଜ ବାଇକ ରଖି ମାର୍କେଟ ଭିତରକୁ ଯାଇଥିବା ବେଳେ ଚୋରୀ କରିଥିଲେ । ଏନେଇ ସେ ଖଡିଆଳ ଥାନାରେ ଅଭିଯୋଗ କରିଥିଲେ । ସେହିପରି ଖଡିଆଳ ବ୍ଲକ ତୁକଲା ଗ୍ରାମର ଜଗଦୀଶ ଦାଶଙ୍କର ବାଇକ ମଧ୍ୟ ଗତ ୩୦/୯/୨୦୧୯ରେ ତୁକଲା ଗ୍ରାମର ବସଷ୍ଟାଣ୍ଡ ନିକଟରୁ ଚୋରୀ ହୋଇଥିଲା । ଏନେଇ ଶ୍ରୀଦାଶ ମଧ୍ୟ ଖଡିଆଳ ଥାନାରେ ଅଭିଯୋଗ କରିଥିଲେ । ପୁଲିସ ଘଟଣାର ତଦନ୍ତ କରି ବାଇକ ଚୋର ବରପଦର ଗ୍ରାମର ଗିରିଷ କୁମାର ନାଏକଙ୍କୁ ଗତରାତ୍ରରେ ଗିରଫ କରିବା ସହ ତାଙ୍କ ଘରେ ଥିବା ଏକ ବାଇକକୁ ଉଦ୍ଧାର କରିଥିଲେ । ଅନ୍ୟଏକ ବାଇକ ବଲାଙ୍ଗୀର ଜିଲ୍ଲା ମୁରିବାହାଲ ବ୍ଲକର ଡୁଡକାପଡା ଗ୍ରାମର ପ୍ୟାରୀଲାଲ ପରାଭୂଏଙ୍କୁ ସେ ବିକ୍ରୟ କରିଥିବା ନେଇ ସୂଚନା ଦେବା ପରେ ପୁଲିସ ଡୁଡକାପଡାରୁ ବାଇକକୁ ଉଦ୍ଧାର କରିଛି । ଏନେଇ ପୁଲିସ ଗତ ଦିନରେ ୨ ବାଇକର ୨୩୪ ଏବଂ ୨୬୧ ରେ ମାମଲା ରୁଜୁ କରିଥିବା ବେଳେ ସେହି ମାମଲା ଅଧାରରେ ଅଭିଯୁକ୍ତ ଗିରିଷଙ୍କୁ ଗିରଫ କରି କୋର୍ଟ ଚାଲାଣ କରିଥିବା ନେଇ ଥାନାଧିକାରୀ କୈଲାସ ଚନ୍ଦ୍ର ସେଠୀ ସୂଚନା ଦେଇଛନ୍ତି ।
