ଗଞ୍ଜାମ – ଗଞ୍ଜାମ ଜିଲ୍ଲା ଦିଗପହଣ୍ଡି ଥାନା ଅନ୍ତର୍ଗତ ଛତାମେରୀ ଗ୍ରାମରେ ଗତକାଲି କଙ୍ଗାରୁ କୋର୍ଟରେ ସୁଦର୍ଶନ ଚୌଧୁରୀ ନାମକ ଜଣେ ଯୁବକକୁ ଦଣ୍ଡିତ କରାଯିବା । ସମ୍ପୃକ୍ତ ଯୁବକଙ୍କୁ ବିଦ୍ୟୁତ ଖୁଂଟରେ ବାନ୍ଧି ନିସ୍ତୁକ ପିଟିବା ସହ ଲଣ୍ଡା କରି ଗାଁରେ ବୁଲାଇବା ଅଭିଯୋଗରେ ପୋଲିସ ୩ ଜଣଙ୍କୁ ଗିରଫ କରିଥିବା ବେଳେ ଚୋରୀ ଅଭିଯୋଗରେ ପୋଲିସ ସୁଦର୍ଶନକୁ ଗିରଫ କରିଛି । ଘଟଣାରେ ପୃଥକ୍ ପୃଥକ୍ ଭାବେ ଦୁଇଟି ମାମଲା ରୁଜୁ କରିବା ସହ ମୋଟ୍ ୪ ଜଣଙ୍କୁ ଗିରଫ କରିଛି ପୋଲିସ ।
ଛତାମେରୀ ଗାଁ ମଧ୍ୟରେ ଥିବା କପିଳେଶ୍ୱର ମନ୍ଦିରରୁ ପାର୍ବତୀଙ୍କ ମୂର୍ତି ଚୋରୀ ଅଭିଯୋଗରେ ଗତକାଲି ସକାଳେ ଗ୍ରାମର କେତେକ ଲୋକ କଙ୍ଗାରୁ କୋର୍ଟ ଡ଼କାଇ ଅଭିଯୁକ୍ତ ସୁଦର୍ଶନଙ୍କୁ ସେଠାରେ ଦଣ୍ଡିତ କରିଥିଲେ । ସେମାନେ ତାଙ୍କୁ ଧରି ପ୍ରଥମେ ଏକ ବିଦ୍ୟୁତ ଖୁଂଟରେ ବାନ୍ଧି ଦେଇଥିଲେ । ସେଠାରେ ନିସ୍ତୁକ ପିଟିବା ସହ ଲଣ୍ଡା କରି ଗାଁରେ ବୁଲାଇଥିବା ଘଟଣା ସାମ୍ନାକୁ ଆସିଥିଲା । ଖବର ପାଇ ପୋଲିସ ଘଟଣାସ୍ଥଳରେ ପହଂଚି ଯୁବକଙ୍କୁ ସେମାନଙ୍କ କବଳରୁ ଉଦ୍ଧାର କରିଥିଲା । ତାଙ୍କୁ ଚିକିତ୍ସା ନିମନ୍ତେ ଦିଗପହଣ୍ଡି ଡାକ୍ତରଖାନାରେ ଭର୍ତି କରିଥିଲା । ଘଟଣାରେ ଦିଗପହଣ୍ଡି ଥାନା ପୋଲିସ ୧୭୬/୧୯ ଓ ୧୭୭/୧୯ ରେ ପୃଥକ୍ ପୃଥକ୍ ଭାବେ ଦୁଇଟି ମାମଲା ରୁଜୁ କରିଛି । ଯୁବକଙ୍କୁ ଅକଥନୀୟ ନିର୍ଯାତନା ଦେବା ଅଭିଯୋଗରେ ପୋଲିସ ଗ୍ରାମର ଟୁକୁନା ବିଷୋୟୀ, ଶଙ୍କର ପାତ୍ର, କନ୍ଧ ବିଶ୍ୱାଳଙ୍କୁ ଗିରଫ କରିଥିବା ବେଳେ ଚୋରୀ ଅଭିଯୋଗରେ ସୁଦର୍ଶନଙ୍କୁ ଗିରଫ କରିଛି । ଅଭିଯୁକ୍ତ ମାନଙ୍କୁ ଆଜି କୋର୍ଟଚାଲାଣ କରାଯାଇଥିବା ନେଇ ଥାନା ଅଧିକାରୀ ବସନ୍ତ କୁମାର ସେଠୀ ସୂଚନା ଦେଇଛନ୍ତି ।
