-
କୋଣାର୍କ-ଭୁବନେଶ୍ଵର ମୁଖ୍ୟ ରାସ୍ତା ଅବରୋଧ କଲେ ଉତ୍ୟେକ୍ତ ଲୋକେ
ପୁରୀ, ପୁରୀ ଜିଲ୍ଲା ଗୋପ ଥାନା ଅନ୍ତର୍ଗତ ବାଲିକନ୍ଦଳ ଗ୍ରାମରେ ଗତକାଲି ରାତିରେ ବାହାଘର ପ୍ରୋସେସନ ବେଳେ ଘଟିଛି ହତ୍ୟାକାଣ୍ଡ । ବରଯାତ୍ରୀରେ ଯାଇଥିବା ଡିଜେ ଗାଡି ଲାଗି ଟେଂଟ କପଡ଼ା ଚିରିବା ଘଟଣାକୁ ନେଇ ପ୍ରଥମେ ଉଭୟଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା । ବଚସାରୁ ଗଣ୍ଡଗୋଳ ଏବଂ ଏହି ଗଣ୍ଡଗୋଳ ପରେ ଉଗ୍ର ରୂପ ନେଇଥିଲା । ଡିଜେ ମାଲିକ ଓ କର୍ମଚାରୀଙ୍କ ଆକ୍ରମଣରେ ଟେଂଟ ମାଲିକ ଗୁରୁତର ହୋଇଥିଲେ । ତାଙ୍କୁ ଚିକିତ୍ସା ନିମନ୍ତେ ଗୋପ ମେଡିକାଲରେ ଭର୍ତି କରାଯାଇଥିବା ବେଳେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଘଟଣାର ପ୍ରତିବାଦରେ ଉତ୍ୟେକ୍ତ ଲୋକେ କୋଣାର୍କ-ଭୁବନେଶ୍ଵର ମୁଖ୍ୟ ରାସ୍ତା ଅବରୋଧ କରିଛନ୍ତି । ଫଳରେ ଦୀର୍ଘ ସମୟ ଧରି ସମ୍ପୃକ୍ତ ରୁଟ୍ ରେ ଯାନବାହନ ଚଳାଚଳ ବ୍ୟାହତ ହୋଇଛି । ଘଟଣାସ୍ଥଳରେ ଉତେଜନା ଲାଗି ରହିଛି । ଡିଜେ ମାଲିକ ଓ ତାଙ୍କର କେତେକ କର୍ମଚାରୀ ଟେଂଟ ମାଲିକଙ୍କୁ ପିଟି ପିଟି ହତ୍ୟା କରିଥିବା ଅଭିଯୋଗ ହୋଇଛି ।
