ମାଲକାନଗିରି, କାଲିମେଳା ପଡିଆ ଜାତୀୟ ରାଜପଥର ପୁସୁଗୁଡା ନିକଟରେ ଆଜି ସକାଳ ୮ଟା ସମୟରେ ମୋଟରସାଇକେଲ ଧକ୍କାରେ ଜଣେ ବ୍ୟକ୍ତିଙ୍କର ମୃତ୍ୟୁ ହୋଇଛି । ମୃତ ବ୍ୟକ୍ତି ଜଣକ କାଲିମେଳା ଅଞ୍ଚଳର ଭଗବାନ ଭୋଳ ( ୫୦ ) ବୋଲି ଜଣାପଡିଛି । କାଲିମେଳା ପଞ୍ଚାୟତ ପୁସୁଗୁଡାଠାରେ ଭଗବାନ ଏକ ଜଳଖିଆ ଦୋକାନ କରି ନିଜର ପରିବାର ପ୍ରତିପୋଷଣ କରନ୍ତି । ପ୍ରତ୍ୟେକ ଦିନ ଭଳି ଆଜି ମଧ୍ୟ ସକାଳେ ଜଳଖିଆ ଦୋକାନ ଖୋଲି କିଛି ସାମଗ୍ରୀ ଆଣିବାକୁ ସାମ୍ନାରେ ଥିବା ଏକ ଦୋକାନକୁ ଯାଇଥିଲେ । ସେଠୁ ଫେରୁଥିବା ସମୟରେ ନାମକୋଣ୍ଡା ଅଞ୍ଚଳର ଜଣେ ଆଦିବାସୀ ଯୁବକ ମୋଟରସାଇକେଲରେ ଆସି ତାଙ୍କୁ ଧକ୍କା ଦେଇଥିଲା । ତାଙ୍କୁ ଏକ ଗାଡି ଯୋଗେ ପ୍ରଥମେ କାଲିମେଳା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସା ପାଇଁ ଭର୍ତ୍ତି କରାଯାଇଥିବା ବେଳେ ପରେ ତାଙ୍କୁ ଜିଲା ସଦର ମହକୁମା ସ୍ବାସ୍ଥ୍ୟକେନ୍ଦ୍ରକୁ ପଠାଇ ଦିଆଯାଇଥିଲା । ସେଠାରେ ତାଙ୍କର ମୃତ୍ୟୁ ହୋଇଥିବା ଜଣାପଡିଛି । କାଲିମେଳା ପୁଲିସ ଘଟଣାସ୍ଥଳରେ ପହଞ୍ଚି ଦୁର୍ଘଟଣା ଘଟାଇଥିବା ମୋଟରସାଇକେଲକୁ ଜବତ କରି ତଦନ୍ତ କରୁଛି । ଭଗବାନ କାଲିମେଳା ଅଞ୍ଚଳର ଜଣେ ଜଣାଶୁଣା ଜଳଖିଆ ଦୋକାନୀ ଭାବେ ପରିଚିତ ଥିଲେ । ତାଙ୍କର ମୃତ୍ୟୁ ପରେ କାଲିମେଳାରେ ଶୋକର ଛାୟା ଖେଳିଯାଇଛି।
