ମାଲକାନଗିରି, ମାଲକାନଗିରି ଜିଲ୍ଲାର ଏକାଧିକ ଅଞ୍ଚଳରେ କାଳବୈଶାଖୀର ତାଣ୍ଡବ ଦେଖିବାକୁ ମିଳିଛି । କେଉଁଠି ଘରର ଛାତ ଉଡ଼ି ଯାଇଛି ତ କେଉଁଠି କାନ୍ଥ ଭୁସୁଡ଼ିଛି । ଏପରିକି କିଛି ସ୍ଥାନରେ ରାସ୍ତା ଉପରେ ବଡ଼ ବଡ଼ ଗଛ ପଡ଼ିଯିବା ଯୋଗୁଁ ଯାନବାହାନ ଚଳାଚଳରେ ବାଧା ସୃଷ୍ଟି ହୋଇଛି । ଗତକାଲି ରାତିରେ ମାଲକାନଗିରି ଜିଲ୍ଲା ମାଥିଲି ବ୍ଲକର ଏକାଧିକ ଅଞ୍ଚଳରେ କାଳବୈଶାଖୀ କିଛି ଏଭଳି ତାଣ୍ଡବ ରଚିଛି । ପୂଜାରୀଗୁଡ଼ା, ଟିଲିଗୁଡ଼ା, ଚାଲାଣଗୁଡ଼ା, ପେଦାଗୁଡ଼ାରେ ପ୍ରବଳ ପବନ ବର୍ଷା ଲୋକଙ୍କ ସମସ୍ୟାକୁ ବଢ଼ାଇ ଦେଇଛି । କେତେକ ସ୍ଥାନରେ ଲୋକଙ୍କ ଘର ଭାଙ୍ଗି ଯିବା ଯୋଗୁଁ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଛନ୍ତି ।
